| Sámediggi almmuha guokte ođđa áppesa |
|
|
|
Sámediggi ordne ođđa anárašgiela ja davvisámegiela áppesiid almmuhandilálašvuođa Anáris Siida auditorios maŋŋebárgga 07.09.2010 dmu 12.00. Dilálašvuođas ovdanbuktojuvvojit ođđa anárašgielat ja davvisámegielat áppesat. Anárašgielat áppesa čálli ja davvisámegielat áppesa čálli, govvideaddji ja bardi leat báikki alde muitaleamen áppesis ja dan válbmenbarggus.
Muu aabis, čohčâ Matti Morottaja čállin ja uŋgárlaš Daniel Gelencsér govven Muu aabis, čohčâ -čakčaáppes lea oaivvilduvvon 1. luohká čakčalohkanbaji eatnigiela oahppagirjin. Maŋŋelis almmustuvvá giđđaoassi ja hárjehusgirji. Go Anáraškiela servi giellabeassedoaimma boađusin šadde anárašgielat luohkát, lei vealtameahttun buvttadit materiálaid eatnigiela oahpahusa várás. Ovdal ráhkaduvvon materiálat ledje čállinvuogi dáfus juo boarásmuvvan, iige daid sáhttán šat geavahit oahpahusas. Matti Morottaja čállinbarggu boađusin almmuhuvvo dál digitálapreanttus Muu aabis, čohčâ- girji. Anárašgielat áppesat leat almmuhuvvon uhccán: vuosttas anárašgiela áppes lei girkohearrá Edvard Wilhem Borga doaimmahan Anar sämi kiela aapis kirje, mii prentejuvvui Oulus 1857:s. Girjjis váldojuvvui ođđapreanttus badjel čuohte jagi maŋŋelis 1983:s. Jagis 1990 almmustuvai anárašgillii davvisámegielas jorgaluvvon Aabis 2- giđđaáppes.
Áppes – Min meahci máidnasat Čakčamánu álgobeivviid bođii prentehusas Inga Guttorm čállin ja Salli Parikka govven Áppes – Min meahci máidnasat -girjji. Girjji bardimis vástida Minna Saastamoinen. Dán girjái laktáseaddji hárjehusgirji almmustuvvá jagi 2011 bealde. Manusčálli Inga Guttorm lea bargan máŋggaid jagiid sámegielat álgooahpahusa oahpaheaddjin Ohcejogas. Girjji govvideaddji Salli Parikka (Wahlberg), lea govven máŋggaid mánáide ja nuoraide oaivvilduvvon girjjiid (www.salliparikka.com). Bardi Minna Saastamoinen máhttá bures sámegiela ja leage bálvalan girjelágádusaid maiddái Norgga bealde. Ovddeš davvisámegielat áppesat "Áppes 1" ja "Áppes 2" almmustuvve Suoma bealde 1980-logus.
Nuortasámegielat áppesbargu lea álggahuvvon Dán giđa Sámediggi bijai johtui maiddái ođđa nuortalašgielat áppesa čállinbargguid. Tiina Sanila-Aikio lea válmmaštallamin manusa ja dat gárvána loahppajagis. Nuortasámegielat giellabeassedoaimma boađusin lea vuordimis, ahte ođđa nuortasámegielat vuosttasluohkálaččat bohtet skuvlii čakčat 2011. Ulbmilin lea válbmet áppesa ođđa oahppiid geavahussii.
Siidda dilálašvuohta lea rabas buohkaide geat beroštit áppesiin. Mediai lea várrejuvvon vejolašvuohta jearahállat dahkkiid ja almmuheaddji. Fállun lea maid gáffe.
Hannu Kangasniemi, oahppamateriálačálli hannu.kangasniemi(at)samediggi.fi, 010-839 3115 Lassedieđut: www.samediggi.fi > Olggosaddimat > Oahppamateriálat |
|
| Viimeksi päivitetty ( 06.09.2010 ) |
