Ovddidanplánas evttohuvvojit duovddahissa ja parkerensadji Sánái, ođđa turisma- ja luopmoviste-guovllut, njealjejuvllatgeinnodat ja maiddái ođđa luottat Čahkaljávrái ja Jeahkkážii. Sámediggi ii sáhte guottihit dáid evttohusaid. Ovddideamis eai leat vuhtii váldon sámekultuvrra ja –boazodoalu dárbbut. Ovddidanplána bilidivččii Sáná riikkaviidosaččat divrras duovdaga ja maiddái Gilbbesjávrri guovllu kulturhistorjjálaš ja biraslaš árvvuid.

Sámediggi oaivvilda, ahte Gilbbesjávrri ovddideamis galgá deattuhit ekologalaš turismma ovddideami ja doarjut olmmošvuimmiiguin ollašuhtton vánddardeami. Ovddidanplánas galgá ovdasajis sihkkarastit guovllu orruid loaktima. Gávdnomis leahkki vuođđoinfrastruktuvrra, nugo duolvačáhceráidnenkapasiteahtta, elrávdnefierpmádat ja mátketelefonfierpmádat galget ožžojuvvot áššáigul-levaš dássái ovdal ođđa huksenfidnuid álggaheami.

Ođđa turismabálvalusaid sáhttá govttolaččat hukset. ”Sadji luopmo- ja turismabálvalusaide ožžojuvvo go luhppojuvvo mátkevovdnaguovlluin ja váldojit dain guorusin báhcán guovllut luopmoviste- ja turismabálvalusatnui”, muitala Klemetti Näkkäläjärvi. Ovddidanplána lea válmmaštallon stuorra hoahpuin. Eanodaga gielda lea evttohan, ahte ovddidanplána dohkkehuvvošii 9.2.2011 stivrenjoavkku čoahkkimis. ”Sámediggi gáibida fidnui joatkkaáiggi geassemánu 2011 rádjái. Ovddidanplána lea gaskan ja ruossalas, váikkuhusaid árvvoštallamat leat váilevaččat ja guovllu orruid ja sámedikki galgá gullat ovdal plánas mearrideami, nu ahte lassiáigi lea duođaid dárbbatlaš”, oaivvilda Näkkäläjärvi.

Gilbbesjávrri ovddidanplána fuolastuhttá guovllu sápmelaččaid. ”Juos evttohusat olláhuvvet, nohká máŋgasis boazodoallu dáppe Giehtaruohttasis. Ovddidanplánas evttohuvvojit nu stuorra guovlluid sirdimat boazodoalu olggobeallái, ahte sámiid vuođđovuoigatvuođat leat uhki vuolde. Ovddidanplána ii sáhte dohkkehit dákkárin”, muitala Per Antti Labba.

Sámedikki cealkámuš Gilbbesjávri 2020-fidnus.

Lassidieđut: ságajođiheaddji Klemetti Näkkäläjärvi, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , tlf. 050-5242109

Sámedikki ovddasteaddji Gilbbesjávri 2020-fidnu stivrenjoavkkus, Per Antti Labba,tlf. 040-9639858