Davvi dimenšuvdna (DD) lea ovttasbargu njealji dásseárvosaš oassebeali Eurohpa Uniovnna, Ruošša, Norgga ja Islándda gaskkas. Eatnandieđalaččat Davvi dimenšuvnna guovlu gokčá Oarjedavve-Ruošša, Nuortameara ja árktalaš guovlluid, fárus maiddái Barentsguovlu. Ovttastuvvan stáhtat ja Kanada leat davvi dimenšuvnna dárkojeaddjeriikkat. Davvi dimenšuvnnas leat njeallje guoibmevuođa: biras-, sosiála- ja dearvvasvuohta-, johtalus- ja logistihkka- sihke kulturguoibmevuohta. Vuosttas davvi dimenšuvnna parlamentáralaš foruma dollui Brysselis jagi 2009. Sámit oassálaste forumii SPR:a ja árktalaš parlamentarihkáriid bissovaš komitea bokte.

Parlamentáralaš forum evttoha eamiálbmogiid vuoigatvuođaid vuhtiiváldima davvi dimenšuvnna barggus. ”Lean hui duhtavaš foruma loahppaárvalussii ja SPR barggai olu loahppaárvalusa ovdii. Čállingotti álgomuttu evttohusas loahppaárvalussan ii lean álggos sátnige eamiálbmogiid vuoigatvuođain. Dál eamiálbmogiid vuoigatvuođat leat vuhtiiváldon viidát loahppaárvalusas ja dan guoibmevuohtaprográmmain. Lea dehalaš, ahte eamiálbmogiid vuoigatvuođat vuhtiiváldojit horisontálalaččat ” muitala Näkkäläjärvi duđavažžan.

Forum gáibida loahppaárvalusas, ahte davvi dimenšuvnna ja eamiálbmogiid gaskasaš ovttasbarggu galgá lasihit ja čiekŋudit. Birasguoibmevuođas forum ávžžuhii stáhtaid sihkkarastit eamiálbmogiid vuoigatvuođaid ovddidettiin ođasmuvvi energiija. Lassin luondduresurssaid ávkingeavaheamis galgá giddet erenomáš fuopmášumi eamiálbmogiid vuoigatvuođaide ja kultur- ja birasváikkuhusaide. ”Lean erenomáš duhtavaš go loahppaárvalusas gáibiduvvui, ahte ođasmuvvi energiijahámiid ja luondduresurssaid ávkingeavaheapmi eai oaččo áitit eamiálbmogiid vuoigatvuođaid. Maiddái Ruošša stáhta dohkkehii dás namuhuvvon hábmemiid. Bieggafápmorusttegat leat birra sámeguovllu áitán boazodoalu. Luondduresurssaid ávkingeavaheapmi, nugo oljju bovren, erenomážit Ruoššas lea áitán máŋggaid eamiálbmogiid áigáiboađu ja kultuvrra jotkkolašvuođa. Sávvamis loahppaárvalus vuhtiiváldo Ruošša energiijapolitihkas. ” Näkkäläjärvi muitala.

Forum evttohii, ahte sosiála- ja dearvvasvuohtaguoibmevuhtii váldošii ođđa oassi, mii guoská árbevirolaš ealáhusaid sihkkarastima ja ovddideami. ” Dát lea oalle dehalaš evttohus. Árbevirolaš ealáhusaid heajos gánnáhahttivuohta ja ealáhusaiguin barganeavttuid hedjoneapmi leat dagahan muhtin eamiálbmotservošiin lossa váttisvuođaid. Ovdamearkan Kanadas, go njurjonáhki gávpi lea EU:a gildosa dihte geahppánan, meahcásteaddjiid boađut leat njiedjan ja máŋgasat leat gártan heaitit ealáhusa. Dát lea dolvon sosiálalaš váttisvuođaide nugo alkoholismii ja juoba iešsorbmemiidda” Näkkäläjärvi čilge.

Davvi dimenšuvnna ođđaseamos guoibmevuohta lea kulturguoibmevuohta. Forum deattuhii, ahte eamiálbmogiid aktiivvalaš oassálastin kulturguoibmevuhtii lea erenomáš dehalaš. ” Eamiálbmogiin lea olu addámuš kulturguoibmevuhtii. Eamiálbmogiid musihkka, dáidda, duodji ja ovdanbukti dáidagat galggašedje leat guoibmevuođa guovddážis” Näkkäläjärvi oaidná. ”Dál leat ožžon dehalaš áššiid foruma loahppaárvalussii ja mii galgat fuolahit das, ahte dat maiddái vuhtiiváldojit davvi dimenšuvnna sierra guoibmevuođain ja ovttasbarggus. Mii eamiálbmogat ja SPR galgat ráhkadit evttohusaid das, mo loahppaárvalusa dehalaš áššiid sáhttá ollašuhttit. Erenomážiti mii galgat guorahallat dan, mo eamiálbmogiid osolašvuođa sáhttá buoremusat sihkkarastit davvi dimenšuvnna ovttasbarggus. Boahtit giehtadallat ášši SPR:a stivrra čuovvovaš čoahkkimis cuoŋománus ja sávvamis oažžut dalle válmmaštallanbarggu bures álgui”, Näkkäläjärvi muitala.

Conference Statement From the Second Northern Dimension Parliamentary Forum 22.-23.2.2011

Davvi dimenšuvnna goalmmát parlamentáralaš forum lágiduvvo Ruoššas jagi 2013.

Lassidieđut: Ságajođiheaddji Klemetti Näkkäläjärvi, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , +358505242109