Sámenuoraid dáiddadáhpáhus ordnejuvvo dán jagi Ohcejotnjálmmi skuvllas njukčamánu maŋimuš beaivvi. Dáhpáhussii leat almmuhuvvon oktiibuot 330 máná ja nuora miehtá Sámi. Dánsungilvui oassálastet 14 joavkku, main leat oktiibuot 99 dánsu. Dasa lassin dáhpáhussii vurdojuvvojit geahččit, nu ahte oassálastit bohtet dánnai jagi leat lahka njeallje čuođi.

Dáhpáhusa váldotemán lea riikkaviidosaš Nuorra Kultuvra –temá mielde dánsun. Dánsunšlájat leat Nuorra Kultuvra –njuolggadusaid mielde modearna dánsa, gáhtadánsun, (show, street, break jna.), etnihkalaš dánssat, baleahtta dahje jazz-/showdánssat. Sámenuoraid dáiddadáhpáhusas boahtit oaidnit modearna dánsuma, gáhtadánsuma ja etnihkalaš dánssaid.

Ohcejoga dáhpáhusas ordnejuvvojit dasa lassin iešguđetlágan bargobájit. Bargobájiid fáddán leat hutkás duodji, silbaduodji, govvagieđahallan, musihkka ja gákti.  

Dáiddadáhpáhusa bargobájit rahppojuvvojit juo ovccis, muhto ieš dánsunčájáhusat álget diibmu 12 Ohcejotnjálmmi skuvlla sáles. Duopmárin leaba neavttár/bagadeaddji Ebba Joks Norgga Deanus ja musihkkár Tiina Sanila-Aikio Čeavetjávrris. Dánsunjoavkkuin válljejuvvo okta joavku sámenuoraid ovddasteaddjin riikkaviidosaš Nuorra Kultuvra MOVES -dáhpáhussii, mii dollojuvvo Oulus mies-semánu 20. – 22. beivviid.

Lassedieđuid addá Sámedikki nuoraidčálli Niina Siltala, tel. 010-839 3134.

Sávvat buohkaide buresboahtin Sámenuoraid dáiddadáhpáhussii duorastaga 31.3.2011!