Sámenuoraid dáiddadáhpáhussii Ohcejoga skuvlii čoahkkanedje njukčamánu maŋimuš beaivvi badjelaš 350 máná ja nuora ovttas oahpaheaddjiiguin Suoma Sámi skuvllain. Ohcejohkalaš Titta Rasmus, guhte jođihii dáhpáhusa ovttas anáralaš Mikke Näkkäläjärviin, álggahii Sámi soga lávlaga masa buohkat serve mielde. Ohcejoga easka válljejuvvon gielddahoavda Matti Korkala buvttii dáhpáhussii dearvvuođaid gieldda bealis. Dánsunčájáhusat besse álgit dan maŋŋá go ohcejohkalaš nuoraid joavkku Moivvas lei lávlon ja čuojahan.

Dáhpáhusa váldotemán lei dánsa riikkaviidosaš Nuorra Kultuvra –dáhpáhusa njuolggadusaid mielde. Ohcejohkii ledje almmuhan mielde 13 joavkku ja okta ovttaskas dánsu, ja oktiibuot lávddi ala dánso lagabui čuođi nuora. Šlájain bivnnuheamos lei modearna dánsa, man lassin oinniimet maiddái gáhtadánssa ja etnihkalaš dánssaid. Dánsungilvvu duopmáriin ledje Tiina Sanila-Aikio Anáris, Solgryn Bär Deanus ja Anna Näkkäläjärvi Ohcejogas.

Sámediggi jugii nuoraide stipeanddaid movttiidan dihte sin joatkit dánsuma. Stipeanddaid ožžo Gáregasnjárgga Sápmi salmiak –joavku sihke 8-jahkasaš solodánsu Biret-Inga Pieski, Eanodaga logahaga Oarjánnieiddat, Vuohču skuvlla Vuohču Ritmajoavkku, Avvila logahaga joavku Villasat sihke Avvila vuolleskuvlla joavku Bohccostallit. Dáid lassin dánsungilvui oassálaste Muzehat ja The Kids Gáregasnjárggas, Geishat, Nauhattaret ja Systema Ohcejogas sihke Skä´mm Čeavetjávrris. Njuorggáma guokte joavkku Njuorggán sihke Áron ja Juuso eaba váidalahtti gal beassange dán vuoru čájehit dáidduideaset, vaikko joavkkut ledje almmuhuvvon fárrui.

Dánsungilvvohallama lassin Ohcejogas ordnejuvvojedje miehtá beaivvi iešguđetlágan bargobájit, maid ordnemis fuolahii Sámediggi Johtti Nuorra –projeakta, jođiheaddjin Anne Kirste Aikio. Fáddán ledje “hutkás duodji”, silbabarggut, govaid gieđahallan, gákti, band –čuojaheapmi ja rap –musihkka. Viššaleamos guhkesmátkkálaččat idjadedje Ohcejoga skuvllas beassan dihtii oassálastit bargobájiide juo iđđedis ovdal dánsunčájáhusaid álgima. Bargobájiide livčče leamašan eanet movttegis oassálastit go ledje áigi ja lanjat. Bargobájiin bivnnuheamos lei silbaduodji.

Dáiddadáhpáhus lihkostuvai hui bures. Dáhpáhusas lea áinge erenoamáš dehálaš sadji sámemánáid ja –nuoraid ja sin oahpaheaddjjid deaivvadanbáikin. Dasa lassin dat fállá vejolašvuođa buktit ovdan skuvllaid máhttu ja kulturdoaimma. Boahtte jagi riikaviidosaš temán lea musihkka, ja doaivvu mielde dalle šaddá stuorát dáiddadáhpáhusa go goassege ovdal ođđa sámekulturguovddážis Sajosis Anáris.

Govat: Hannu Kangasniemi