Sámenuoraid dáiddadáhpáhusas ledje guokte hui sierralágan dánsunčájáhusa, mat goappašagat ánssášeaba beassat riikkaviidosaš MOVES – dáhpáhussii miessemánu 20. – 22. beaivvi.

Bohccostallit -joavkku dánssas duopmáriid geasuhii erenoamážit dánssa idéa, man vuolggasadji lea čiekŋalasas eamiálbmot- ja sámekultuvrras. Čájáhussii lei viisásit válljejuvvon okta čielga temá, man dánsut dolvo čehpet ovddošguvlui. Visuálalaččat oktilaš čájáhusa ealáskahtte seammasullasaš muhto earaláganis gárvvut. Jietnaduogážin lei roahkadit válljejuvvon sihke gárvves musihka skearrus ja lávddi alde čuojahuvvon musihka, man musihkkajoavkku ovdanbuvttii juigosiiguin ja lávlagiiguin.

Duopmáriid mielas Bohccostallit –joavkku čájáhusa koreografiija lei čielggas ja hámálaš, persovnnalašvuohta ja mokta bovttihedje inspirašuvnna. Dánsuid mieldeorrun lávddi alde lei eakti ja čáppis oaidnit, dánsumis sirdašuvai buorremielalašvuohta, eallinvuoibmi ja illu. Dánsut atte áiggi ja saji guđet guimmiidasaset. Jovkui gullet Fasku-Oskal Magga, Vilho-Simon Mäkinen, Ellenoora Haataja, Jan-Kristian Magga, Sandra Salminen, Lassi-Olavi Mäkinen, Ida Grönmo, Sara Keränen ja Toni Salminen. Bohccostallit leat maiddái bovdejuvvon loaiddastit Open Stages dahjege Davvi-Suoma Meahccemeassuin Oulu – hálles.

Villasat geasuhii duopmáriid roahkadit iežaslágan ja earalágan modearna dánssain, masa nuorat ledje válljen hutkkas, abstrákta temá. Čájáhusa guokte vuostálas elemeantta - ”Doaivut ja vuoimmehuvvat” – sirdašuvve bures gehččiide gárvvuid, lihkastemiid ja musihka bokte. Visuálalaččat dánsa lei oktilaš ja guoimmuheaddji čájáhus, man fiinna gárvvut ealáskahte vel eanet. Jietnaduogáža musihkkaválljen lei lihkostuvvan, nu ahte duopmáriid mielas čájáhus lei bures gárvvistuvvon ja váikkuheaddji epihkalaš ollisvuohta.

Duopmáriidda Villasiid fámolaš ja váikkuheaddji čájáhus lei vuordemeahttun dáiddavásihus. Hutkásvuođas ja earaláganvuođas dihte dánsa šattai gelddolaš ja symmehtralaš ollivuohtan. Dánsuid máhttu ja ovdanbuktima válmmašvuohta čájehedje masá ámmátlaš dárkilvuođa. Dánsuid vuorrováikkuhusas vuhttui inspirašuvdna, ja geahčči sáhtii áicat dánsuma ilu, dola ja movtta. Joavkkus dánsot Sunna Nousuniemi, Nette Pulkkinen, Maria Saijets ja Gabriela Satokangas, ja Anne Olli čuojaha rumbbu. Nieiddat leat ieža hutkan čájáhusa idéa ja ollašuhttán dan. 

Lassedieđut Nuorra Kultuvra – dáhpáhusas (ee. dánsuid áigetávvalat) gávdnojit interneahtas čujuhusas http://www.ouka.fi/moves/.

Čuovgagovat Hannu Kangasniemi