Ijahis idja – eamiálbmogiid musihkkadáhpáhusas Anáris dán geasi gullat ovtta Tuva čeahpimus čottalávlu, Igor Koshkendei. Koshkendei lea riikkaidgaskasaččat dovddus ja son lea ožžon ruovtturiikkastis Tuvas hui alla khoomeyzi-árvonama. Son máhttá buot khoomei-stiillaid ja lea vuoitán Gaska-Asia Grand Prix III –gilvvu.

- Tuvalaš čottalávlun lea earenoamáš lávlunvuohki, mii lea boktalan miehtá máilmmi beroštumi. Čottalávlu nagoda buvttadit máŋggaid čuoddji jienaid oktanaga. Igor Koshkendei guhte galgá boahtit lávddi ala Ijahis ijas lea eret Tuvas, Lulli-Sibirjás, mii lea guovddáš báiki čottalávlumii, muitala Ijahis ija riikkaidgaskasaš áššiid koordináhtor Marina Falevitch Sámi oahpahusguovddážis.

Jagi 2011 temán Eatnama jienat

Ijahis idja -eamiálbmogiid musihkkadáhpáhus lágiduvvo Anára girkosiiddas gávccát háve 19.–21.8.2011. Festivála lea láhččán alcces saji deháleamos sámemusihka dáhpáhussan Suomas. Festivála temán lea dán jagi Eatnama jienat, mii joatká Ijahis idja dáhpáhusa eamiálbmottemá. Temá govvida eamiálbmogiid earenoamáš oktavuođa eatnamii ja dan movt sin musihkka bohciida birrasa luonddus. 

Ijahis ija váldodáhpáhus lea Ijahis idja! -konsearta lávvardaga 20.8, gos gullát Igor Koshkendei lassin sápmelaš jietnačeahpi Wimme, sámegielat ráppára Slincraze Mázes, SomBy, Niillas Holmberga, Anára joavkku The Slap ja árbevirolaš juigiid davviriikkaid oktasaš Juigiid searvvis ja dan lassin ollu eará sámemusihka.

Ijahis idja -dáhpáhusa lágidit ovttasbarggus Anára Sámisearvi, Sámediggi, Sámi oahpahusguovddáš, Sámemusea Siida, Anára gielda, Sámi mánáidkulturguovddáš ja Giellagas-instituhtta.

Lassedieđuid festiválajođiheaddji Anna Näkkäläjärvis, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , tlf. +358108393148 ja dáhpáhusa interneahttasiidduin čujuhusas www.ijahisidja.fi.