Lean 18-jahkásaš sámenuorra, eret Leammi Äivihjávrris. Eatni bealde gulan Aikio sohkii. Lean riegádan guovttegielat bearrašii. Mu eatnigiella lea davvisámegiella, man lean oahppan báldalagaid suomagielain.

Leamašan davvisámegielat beaiveruovttus Anáris ja vázzán sámegielat vuođđoskuvlla vuolledási Menešjávrris ja badjedási Anáris. Dál stuđeren Sámi oahpahusguovddážis, Doaivonjárggas, boazodoallofitnodatolmmožin ja nuppe vuoro fas Avvila logahagas. Ulbmilin lea čađahit dutkosiid dáid oahppolágádusain.

Lean unnivuođa rájes jurddašan álgit badjealmmájin ja ássat davvin. Sápmelašvuohta, bohccot ja Lappi guovlu leat munnje dehálaččat. Danin leange hálidan joatkit mu máddariid árbbi, boazodoalu, ja stuđeret badjealbmá ámmáhii. Boazobargguid lassin mu astoáigge doaimmaide lea álo gullan valástallan. Vuođđoskuvlaáigge čuoigan ja friijavalástallan ledje mu miela mielde. Dál spealan sisbandy.

Sápmelašvuohta lea oassi mu. Dat lea munnje árgabeaivi inge mun dárbbaš ieš dan sierra meroštallat. Mu sápmelašvuhtii gullet bearaš, sohka, giella, bohccot ja eará luondduealáhusat sihke gárvodeapmi sámegáktái. Sámegákti lea munnje lagamustá čikŋabivttas, man geavahan erenomážit bearaš- dahje sohkaávvudemiin, muhto maiddái earáge dilálašvuođain, main ovddastan sápmelaččaid.

Sávan ahte mis livčče boahttevuođasge buorit eallima eavttut dáppe davvin. Galggašedje leat skuvlenbáikkit ámmáhiidda, mat dáppe dárbbašuvvojit ja main dáppe birge. Mis galggašedje gávdnot dáppe bargobáikkit, vai oahpuid maŋis vuolgán nuorat sáhtášedje máhccat oahpuid maŋŋá ruoktoguvlui.