Don goas it riegát luomejeaggái, eadni láve leikošit fulkkiide mu birra. Lean eret Avvilis, gos ássen 17 guhkes jagi. Galhan Avvil lea čáppa ja somás báiki, muhto leamašan duođaid somá beassat havssašit ođđa biekkaid gávpogii. Stuđeren dál Oulus logahaga nuppi jagi ja mus šaddá muhtun beaivve vel psykologa, nu lean mearridan. Hálidivččen fárret olgoriikkaide dalán go lean geargan oahpuiguin. Ja hálidan áinnas beassat váikkuhit áššiide, danin lean maid duođaid beroštuvvan politihkas. Liikon dádjut ja suohtastallat, lei dal dilli makkár beare. Mus lea beroštupmi máŋggalágan kreatiivvalaš astoáigge doaimmaide nugo ovdamearkka dihte málemii, divttaid čállimii ja govvemii. Duddjon maiddái sámedujiid álo go dasa báhcá áigi. Dál lean duddjomin alccen skuvlaatnui sistelávkka. Eadni lea njulgestaga meašttir sámedujiin ja lean movtta ahte mus lea ruovttus vejolašvuohta oahpahallat duddjoma.

Sápmelašvuohta lea munnje dehálaš inge hálidivčče gullat mange eará kultuvrii. Ruovttus ii leat iešalddes goasge hállon sámegiella inge iešge máhte dan. Duođaid vahát mu mielas, bággu mieđihit. Giella lea goit nu stuorra oassi kultuvrra ja mun bázán dan haga. Lean lohkan davvisámegiela nuge guhká go 11 jagi, vuolledásis logahahkii ja dattetge in máhte. Dál sámegiela oahput leat goit báhcán eret, go dáppe Oulus lea duođaid váttis oažžut oahpahusa. Ja gáiddusstuđeren ii riekta movttiidahte ja bargguid lea váttis oažžut gárvvisin. Munnje sápmelašvuohta mearkkaša iežan čiekŋalamos ruohttasiid ja buot dan mii mun lean. Geavahan iežan biktasiin sámedujiid ja hálidan olbmuid oaidnit ahte lean sápmelaš.

Hálidivččen oahppat davvisámegiela, vai sáhtášin hállat dan iežan mánáide. Nu maiddái árbevieruiguin, lea buorre ahte árbevierut leat seilon nu bures! Iihan sápmelašvuohta eanaš olbmuin oidno nuge árggas, muhto go sápmelaččat čoahkkanit oktii, de árbevierut gal maiddái oidnogohtet. Sápmelašvuohta lea fiinna ášši ja mu mielas buot sápmelaččat galggašedje roahkkadit čájehit ahte sii leat sápmelaččat.