Ijahis idja -eamiálbmogiid musihkkadáhpáhus buktá Anárii dán jagi sápmelaš jietnadáiddára Wimme. Jagi 2010 Wimmes almmustuvai albuma ”Mun” ja dán jagi Ijahis ijas son buktá ovdan ee. materiála ođđa skearrustis. Wimme lea okta dain riikkaidgaskasaččat dovddus sápmelaš artistain ja su ođđasamos skearru lea vuvdojuvvon earenoamáš bures.

Ijahis ija lágideaddjit leat movttas, go Wimme fidnejuvvo Anárii doallat konseartta. – Dán jagi Ijahis ija temán lea Eatnama jienat, suomagillii Maan äänet. Wimme musihkka heive temái hui bures. Son lea jienageavaheami meašttir ja hálddaša juoiganárbevieru. Wimme maiddái oahpaha mánáid bargobájiin ja dán láhkai su máhtolašvuohta sirdašuvvá nuorat sohkabuolvvaide, festiválahoavda Anna Näkkäläjärvi muitala.

Ijahis idja! -konsearttas fállojuvvo sápmelaš rock ja “ráp”

Ijahis idja - eamiálbmogiid musihkkadáhpáhus lágiduvvo Anára kirkosiiddas gávccát háve 19.–21.8.2011. Festivála lea šaddan sámemusihka ovdanbukti deaŧalamos dáhpáhussan Suomas. Ijahis ija váldudáhpáhus lea lávvardaga 20.8. goas lágiduvvo Ijahis idja! -konsearta, mas Wimme lassin leat ee. ráppár Slincraze Mázes, Niillas Holmberg ja SomBy. Viittis populáramusihkkafállama lassin Ijahis idja! -konsearttas gullat maiddái fas árbevirolaš juoigama, go ee. davviriikkaid oktasaš Juoigiid searvvi lahtut juiget ja gullat maiddái eamiálbmogiid musihka.

Ijahis idja -dáhpáhusa lágidit oktasašbarggus Anára Sámisearvi, Sámediggi, Sámi oahpahusguovddáš, Sámemusea Siida, Anára gielda, Sápmelaš mánáidkulturguovddáš ja Giellagas-instituhtta.

Lassedieđut festiválahoavda Anna Näkkäläjärvis, Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen. , tel. +358108393148 ja doaluid fierbmesiidduin čujuhusas www.ijahisidja.fi.