Sámi teáhter Beaivváš Sajosis |
![]() |
![]() |
Sámi nášunálateáhter Beaivváš boahtá Sajosii sotnabeaivve guovvamánu 26. beaivve. Oaidnit Sajosis Stáinnak-nammasaš oppa bearráša čájálmasa, man giehtačállosa lea čállán Marry Áilonieida Somby. Stáinnak lea ulddaid boazu, mii šaddá dáhpedorpmis olbmuid ja elliid máilbmái, ja álgá guohtut boasttu sajes ja boasttu áiggis. Stáinnak -čájalmasas leat ollu áigeguovdilis temát, vaikko dat vuođđuduvváge juo golbmalot jagi dassái dahkkojuvvon tekstii.
Govain Leammuid Biret Rávdná/ Alitoambealli, Sarakka Gaup/ Ruksesoambealli ja Áilloš/ Gieddegášáhkku. Govat: Beaivváš/ Stainnak/ Mienna.
Čájalmas lea dramáhtalaš ja gelddolaš, dat sihke baldá ja guoimmuha, dadjá Marry Ailonieida Somby. - Čájalmasa ulbmilin lea čájehit vuostehagu luonddu billisteami vuostá. Stáinnak -čájalmasas lea mielde ulddat ja stálut ja ulddaid vilges lihkkoboazu Stáinnak.
Ulddaid boazu Stáinnak šaddá dáhpedorpmis olbmuid ja elliid máilbmái, ja álgá guohtut boasttu sajes ja boasttu áiggis. Stáinnak deaivvada Rohttupolitiijain gii bidjá Stáinnaha butkái. Alit ja Ruksesoambealášguovttos geat leabba Stáinnaha buoremus ustibat áiggošeigga veahkehit su, juoga mii ii leat nu álki. Gájudettiin gávnnadeaba Alit ja Ruksesoambealaža guovttos sihke siivus ja bahás karakteraiguin. Soai beassaba maid gullat ahte muhtiinat leat álgán huksegoahtit atomarusttegiid ja vel vearrábut áššiid. Ulddaguovttos šaddá dramáhtalaš mátki sihke albma máilmmis ja eatnanvuolážiid máilmmis. Ja mihttomearri lea gádjut Stáinnaha, muhto Rohttupolitiija ja Jurratruolla gal eaba liiko dasa.
Roger Ludvigsen lea dahkan čájalmasa musihká. Dan lea bagadallan Victoria Kahn. Lávde- ja bivttáshábmema lea dahkan Sara Kander, čuovgahábmema Bernt Morten Bongo.
Neavttárat: Beaivváš -teáhtera fasta neavttárat Egil Keskitalo, Áilloš ja Svein B. Olsen, eará čájahallin leaba Sarakka Gaup ja Leammuid Biret Ravdna.
Loga dás lasi.
Beaivváš -teáhtera čájalmas Sajosis sotnabeaivve 26.2. dmu 17 rájes.
Bileahtat uvssa bokte: 18 euro/ráves olbmot 12 euro/ealáhatolbmot ja stuđeanttat 8 euro/mánát |
|
Viimeksi päivitetty ( 12.02.2012 ) |