| Sámenuoraid dáiddadáhpáhussii olahusmearri oasseváldit |
|
|
|
Sámenuoraid dáiddadáhpáhussii, mii lágiduvvo Anáris Sajosis njukčamánu loahpas, leat boahtimin olahusmearri oasseváldit. Dáhpáhussii leat almmuhan dál juo badjel 350 olbmo, muhto go maŋimušge almmuheamit bohtet, de oasseváldiid mearri loktana várra badjel njealji čuohtái. Oasseváldit bohtet dán jagi sámeguovllu lassin maid Roavvenjárggas ja Helssegis. Musihkkagilvui leat almmuhan oktiibuot 19 joavkku, main ovddastuvvojit sihke anáraš-, nuortalaš- ja davvisámegielat ja oktiibuot 140 nuora.
Almmuheamit leat boahtán sihke gaskavahko 28.03. njoarostansáttačuoigamii ja njoarostangilvui ja duorastaga musihka geahčalmasbeaivái. Musihkkageahčalmasas duopmárat válljejit sámenuoraid ovddasteaddjiid álbmotlaš Sounds-dáhpáhussii Turkui.
Sámekulturguovddáš Sajos addá dán jagi dáhpáhussii fiinna rámaid. Duorastaga musihkkagilvvu báikin lea sullii 400 olbmo Dolla-auditoria, gos geavahusas lea kvalitehta dáfus buorre teknihkka oktan čuovggaiguin ja beavttálmahttinrusttegiiguin.
Sámenuoraid dáiddadáhpáhus lea riikkaviidosaš Nuori kulttuuri -dáhpáhusráidui gullevaš sámegielat guovlludáhpáhus, man váldolágideaddjin lea sámediggi. Anára dáhpáhusa lágideamis leat mielde maid Anára skuvla, Sámi oahpahusguovddáš ja báikkálaš sámesearvi Anára Sámi searvi.
Lassediehtu sámenuoraid dáiddadáhpáhusas dás.
Čuovo neahttasiidduid! Oaidnalat Sajosis 28.-29.03! |
|
| Viimeksi päivitetty ( 09.03.2012 ) |
