| Buresboahtin ávvudit Sajosa ja Sámedikki! |
|
|
|
Sámedikki válgabaji 2012–2015 rahpamat ja Sajosa vihahanávvudoalut lágiduvvojit cuoŋománu 3.-4. beivviid Anáris. Ávvudoalut álget maŋŋebárgga 3.4. dmu 15-16 Anára sámegirkus ekumenalaš ipmilbálvalusain ja joatkašuvvet dmu 20-22 Sajosis kultureahkediin. Dát dilálašvuođat leat rahpasat buohkaide. Ipmilbálvalusa ja kultureahkeda gaskkas lágiduvvo dušše bovdejuvvon gussiide oaivvilduvvon virggálaš rahpan - ja vihahandilálašvuohta. Ávvudoalut joatkašuvvet maŋit beaivve Sajosis. Dalle uvssat leat rahpasat dmu 11-17 ja prográmma ordnejuvvo oppa beaivvi.
Anára sámegirkus dmu 15 álgi ekumenalaš rahpanipmilbálvalus lea bismmámeassu. Sávvat ahte girkomeanuide oassálasti olbmot livčče báikki alde maŋimuštá 14.45. Dieđihat dilálašvuođa dárkilut prográmmas maŋŋelis neahttasiidduineamet.
Sajos lea giddejuvvon álbmogis maŋŋebárgga 3.4. dmu 15-19 gaskasaš áigge. Uvssat rahpasit fas dmu 19. Ávvovehkii guossohuvvo káffe dmu 19-20. Sávvat ahte kultureahkedii boahtti olbmot livčče báikki alde dmu 19.45.
Kultureahkeda jođiha Ánne Kirste Aikio ja feastta rahpansániid cealká rektor Liisa Holmberg. Dáiddárat Marja Helander ja Outi Pieski muitaleaba dujiideaskka birra, mat leat oidnosis Sajosis. Báikki alde leat maiddái stáhta dáiddabargodoaibmagotti várreságajođiheaddji Veli Granö sihke Sajosa lássaliinniid plánejeaddjit Tytti Bräysy ja Anna-Leena Pyylampi.
Kultureahkeda prográmmas loaiddastit neavttár Irene Länsman, anárašgielat lávlunjoavku Koškepuško, anárašgillii lávlu Heli Aikio ja nuortalaš leudd’a ovdanbukti sámedikki 1. várreságadoalli Tiina Sanila-Aikio. Davvisámegillii musiserejit Wimme Saari, Ánnamáret Ensemble, Anna Näkkäläjärvi-Länsman, rap-musihkar Áilu Valle ja Annukka Hirvasvuopio-Laiti.
Dieđihat Rabas uvssaid Álbmotfeastta (lágiduvvo gaskavahko 4.4.) dárkilut prográmma birra maŋŋelis min neahttasiidduin. Vuordimis lea ivdnás, ilolaš ja kultuvrra sisttisdoalli ávvubeaivi!
Buresboahtin! Čuovo neahttasiidduid! |
|
| Viimeksi päivitetty ( 30.03.2012 ) |