Sámegielat musihkka skádjá ja suohpanat njurgot go čađa áiggiid stuorámus sámenuoraid dáiddadáhpáhus álgá Anáris gaskavahku 28.3. Dáhpáhus álgá njoarostan- sihke njoarostansáttagilvvuin Anára čuoiganstašuvnnas dmu 13.30. Eahkedis čoahkkanuvvo dáiddadáhpáhusa rahpamiidda, sámenuoraid ođđa joavkku Irdon konsertii ja bálkkašumiid juohkindilálašvuhtii Sajosii dmu 18. Lágideaddjit vurdet báikki ala buriin muniin badjel 400 oassálasti. Njuolggosátta neahtas duorastaga dmu 9.55-17 čujuhusas: http://yle.fi/livestream/saamevideo.asx .

Sámenuoraid dáiddadáhpáhusat leat lágiduvvon 1970-logu rájes ja dáhpáhus lea stáđásmahttán sajádaga sámeguovllu skuvllaid bargoprográmma ja sámedikki doaimma oassin. Dáhpáhus lágiduvvo vuorrojagiin sámiid ruovttuguovllu gielddain ovttasbarggus báikkálaš skuvllaiguin ja báikkálaš sámeservviiguin. Dán jagi ordnedallamiidda oassálastet sámedikki lassin Anára skuvla, Sámi oahpahusguovddáš ja báikkálaš sámesearvi, Anára Sámisearvi.

Gaskavahku nuorat gilvvohallet njoarosteamis ja njoarostansáttačuoigamis golmma sierraahkásaččaide dárkkuhuvvon gilvoluohkás. Njoarostan- ja njoarostansáttagilvvu lágidit ovttasbarggus Sámi oahpahusguovddáža luondo- ja meahcceoahpisteaddji oahppit sihke Inarin Yritys ja Anára Sámisearvvi aktiivvat. Gilvvu jođiheaddjin doaibmá Áslak Paltto. 

Dáhpáhusa váldobeaivi lea duorastat, goas ođđa sámekulturguovddáš Sajosa teknihka ja stuorra auditorio leat vuosttas háve dievas anus. Sále dievvá Njuorggámis, Ohcejogas, Norgga beale Sirpmás, Gáregasnjárggas, Čeavetjávrris, Heahtás, Gárasavvonis, Roavvenjárggas, Soađegilis, Vuohčus, Avvilis, Dearpmážis ja Anáris dáhpáhussii oassálasti nuorain fuolaheaddjiiguin ja oahpaheaddjiiguin. Dáhpáhusa várás lea ráhkkanuvvon mánotbajiid skuvllain ja buđaldusjoavkkuin. Dáhpáhusa válljugas oassálastin duođašta, ahte sámegielat musihkka geasuha sakka nuoraid.

Duorastaga prográmmai gulavaš musihkkageahčalmassii leat almmuhan oktiibuot 20 bändi ja loaiddasteaddjijoavkku sámeguovllu buot guovlluin ja Roavvenjárgga gávpogis. Duopmárat válljejit oassálastiid gaskavuođas sámenuoraid ovddasteaddjiid riikkadási Nuorra Kultuvra Sounds–dáhpáhussii, mii lágiduvvo Turkus miessemánus. Gilvoluohkáid golbma buoremusa bálkkašuvvojit stipeanddain. Duopmáriin nuortalašgiela ja rock-musihka ovddasta Tiina Sanila-Aikio, anárašgiela ja máŋggaid musihkkašlájaid Heikki Nikula, davvisámegiela ovddastit rap-musihkar Áilu Valle ja árbevirolaš juoigama meašttir Inga-Máret Gaup-Juuso.

Dáhpáhusa teknihkas vástidit sámedikki bálvalanovttadaga teknihkarat Joonas Saari ja Janne Lappalainen, sámi oahpahusguovddáža Erkki Feodoroff ja Tuupa Records Heikki Isokoski. Dáhpáhusteknihka lágideapmái oassálastá maiddái Yle Sámi radio. Sajosa Dolla-auditorio addá dáhpáhussii fiinna birrasa, go anus leat teáhter- ja konseartadálu jietna- ja čuovgateknihkka buot lasiiguin.

Sámediggi lea lágidan linnjabiilasáhtuid, borademiid ja idjademiid buot Avvila Dearpmáža guhkkelebbos boahtti oassálastiide. Dáhpáhusa gráfalaš bajiloainnu (plakáhta, oassálastinduođaštusat, logo ja dáhpáhusa poastakorte) lea plánen Tanja Sanila. Dáhpáhusa lágideapmái lea ožžojuvvon stáhtadoarjja oahpahus- ja kulturministeriijas.

Dáhpáhusa áigetávval gávdno dákko ja musihkkagilvvu loaiddastanortnet dákko.

Lassidieđut: -

 dáhpáhusčálli Heli Huovinen, 050-401 8009

- dáiddadáhpáhusvásttolaš Anni Näkkäläjärvi, 040-511 1821

- vs. nuoraidčálli Inka Nuorgam, 050-382 5179

- skuvlenčálli Ulla Aikio-Puoskari,040-767 3101.