Lean riegádan 5.11.1990 Roavvenjárggas. Lean riegádeami rájes ássán sámeguovllu olggobealde. Min ruovttus leat goittotge álo hállán sámegiela ´ruoktogiellan´, nu ahte lean máhttán giela nu guhká go fal muittán. Dasa lassin lean ožžon sámegiela oahpahusa vuođđoskuvllas. Muittán álo mo orui veahá ártet go iežan eadni oahpahii ja attii ruoktoleavssuid.

Sápmelašvuohta mearkkaša munnje ollu. Geavahan gávtti milloseappot go čáhppes biktasa daningo gákti lea vuohkkasut, čáppasut ja mii lea dehálaš, dat muitala gos mu sohka boahtá ja mii mun lean. Lean maid atnán iežan eanet sápmelažžan go suopmelažžan. Sápmelašvuohta leamaš álo hui nanus min bearraša árgabeaivvis vaiko sámásteapmi leamašge vejolaš dušše ruovttus, vilbeliiguin, oambeliiguin ja áhku luhtte.

Iskkan beassat studeret Oului medisiinnalaš dieđagoddái daningo doaktára ámmát leamaš mu niehku badjedási rájes. Sávan maid, ahte sáhtášin boahttevuođas ovttastit sámegiela maiddái iežan bargui. Lean ilus, ahte máhtán sámegiela ja sáhtán geavahit dan friija álo go lea miella. Dáhtošin sirdit dán seammá dovddu ja friijavuođa maiddái boahttevaš buolvvaide, beroškeahttá das ássetgo sii sámeguovllus dahje dan olggobealde.