Sámedikki čoahkkin dohkkehii doaibmaprográmma sámediggebadjái 2012-15 |
Sámedikki čoahkkin dohkkehii 20.6.2012 doaibmaprográmma ja ekonomiijaplána sámediggebadjái 2012-15. Doaibmaprográmma sisdoallá sámedikki váldoulbmiliid sihke dárkilis oktasaš ja sektormieldásaš ulbmiliid sámediggebadjái 2012-15.
”Lean duhtavaš sámedikki čoahkkima dohkkehan doaibmaprográmmai. Oktasaččat dohkkehuvvon doaibmaprográmma vuodju sámiide deháleamos áššiid ovddideapmái ja buorideapmái, ja boahtá stivret sámedikki doaimma dán válgabaji áigge jagi 2015 rádjai”, muitala sámedikki ságajođiheaddji Klemetti Näkkäläjärvi.
Sámedikki čoahkkima 20.6.2012 dohkkehan sámediggebaji doaibmaprográmma 2012-2015 váldoulbmilat leat: 1. ILO 169-soahpamuša ratifieren 2. Davviriikkalaš sámesoahpamuša ratifieren 3. Sámediggelága ja -ásahusa ođasmahttin sihke sápmelašmeroštallama rievdadeapmi 4. Sámiid iešmearridanvuoigatvuođa ollašuvvan dievasmearálaččat 5. Katainen ráđđehusprográmma sámemerkejumiid ollašuvvan dievasmearálaččat 6. Sámegielaid ealáskahttinprográmma ollašuhttima álggaheapmi 7. Álbmotlaš artikla 8(j) - bargojoavkku evttohusaid ollašuhttin 8. Eamiálbmotjulggaštusa ollašuhttin Suomas 9. Sámekultuvrra ja árbevirolaš ealáhusaid suoji ollašuvvan 10. Sámekultuvrra hedjonahttima suoji viiddideapmi čáhcelága mieldásaččat sámiid guoski buot sierralágaide 11. Sámiid ruovttuguovllu ja árbevirolaš ealáhusaid eallinfámu sihkkarastin 12. Eretfárrema geahpedeapmi ja ruovttoluotta fárrema lasiheapmi sámiid ruovttuguvlui 13. Gielalaš ja kultuvrralaš vuoigatvuođaid ollašuvvan olles riikkas 14. Sámi parlamentáralaš ráđi beaktilis doaibman 15. Sámegiela ja sámegielat oahpahusa sajádaga, fálaldaga ja sámesisdoalu ovddideapmi 16. Sámiid buorredili ja oasálašvuođa ovddideapmi
Sámedikki čoahkkin dohkkehii váldoulbmiliid ovttamielalaččat, earret čuoggá 3., mii dohkkehuvvui jienain 11-3.
Oktasaš dárkilis ulbmilat leat sámiid searválasvuođa ovddideapmi, sámi árbevirolaš dieđu sihkkarastin, sámi kulturbirrasa sihkkarastin, sámekultuvrra eallinfámu dorvvasteapmi olles riikkas, sámedikki válgavuogádaga ovddideapmi, sámedikki ieas doaimma ovddideapmi ja sámedikki ovddugohcima buorideapmi.
Sektormieldásaš dárkilis ulbmilat leat sámi ealáhuspolitihka, sámegiela eallinfámu dorvvasteapmi, sámemánáid ja -nuoraid sajádaga ovddideapmi, sámegielat sosiála- ja dearvvasvuohtabálvalusaid buorideapmi, sámiid kulturbálvalusaid ja dáiddaeallima ovddideapmi, sámeoahpahusa ja allaskuvlejumi ovddideapmi ja sámi parlamentáralaš ráđi doaimma ovddideapmi.
Sámedikki čoahkkima dohkkehan ekonomiijaplána jođiha sámedikki válgabaji ruhtadeami ohcama ja ruhtadeami geavaheami. Válgabajis sámediggi geahččala fidnet ođđa virggiid sámediggái sámegielat bálvalusaide, sámiid ruovttuguovllu olggobealde ássi sámiid vuoigatvuođaid ovddideapmái, biras- ja ruvkeláhkaáššiid áššegieđahallamii sámedikkis sihke geahččala vuođđudit sámi ealáhusfoandda, mainna dorjojuvvošedje sámeealáhusaid ja árbevirolaš dieđu seailun árbevirolaš sámeealáhusain.
|
|
Viimeksi päivitetty ( 27.06.2012 ) |