Mu namma lea Johanna Njaita ja lean 22-jahkásaš. Boađán Ruoŧas lullisápmelaččaid guovllus unna gilážis man namma lea Hemavan. Dat lea guoktelogi kilomehtera geahčen Deartnas. Lean ieš ubmisápmelaš, muhto lean studeren lullisámegiela vuosttas luohká rájes Deartna sámeskuvllas. Skuvllas ii lean ubmisámegiela oahpaheaddji, nu ahte mii eat sáhttán lohkat iežamet giela. Ubmisámegiella lea hui unna ja áitatvuloš giella eaige dan hállit leat máŋga.

Dál orun Johkamohkis gos mun studeren Sámij åhpadusguovdásjis siste- ja dipmadujiid. Sámij åhpadusguovdásj lea addán munnje olu, danin go lean oahppan ollu árbevirolaš dujiin. Dáppe oahppá maiddái ollu sámiid historjjá, eará sámeguovlluid ja sámiid árbevieruid birra.

Ovdalgo álggahin oahpuid Sámij åhpadusguovdásjis studerejin Sollefteås, Gaska-Ruoŧas. Doppe studerejin sámedujiid hábmema ja Alpine line’a. Go vázzen sámeduodjeskuvlla mus ii lean sápmelaš oahpaheaddji, muhto fertejin baicce riŋget dávjá eadnái ruoktot ja jearrat maid ja mo juoga galgá dahkkot. Oahpuid álggaheapmi Johkamohkis váikkuhii munnje dieinna lágiin, ahte ovdánin doppe issorasat eandaliige duojis, danin go doppe ledje sápmelaš oahpaheaddjit.  

Sápmelašvuohta lea stuorra oassi mu identitehta. Bajásšadden dasa inge sáhtášii govahallat iežan eallima sápmelašvuođa haga. Mu sámevuohta lea gievron olu dan maŋŋá go álggahin oahpuid Johkamohkis, daningo gulan sámegiela beaivválaččat ja lean beassán mielde sámedujiide.