Natalia lea 19-jahkásaš nuortalašnieida eret Ruošša Murmánskkas, gos son lea orron olles eallima ja orru ain. Dál Natalia studere eŋglándalaš filologiija universitehtas, gos son lea studeren juo guokte jagi, nappo son lea čađahan bachelor-dutkosa. Dan ovdal son čađahii vuođđoskuvlla, mii bistá Ruoššas oktiibuot 11 jagi, daningo doppe suopmelaš lágan logahat gullá oassin vuođđooahpahussii. Doppe sáhttá joatkit njuolgga universitehtii jus háliida.

Natalia dovdá, ahte sápmelašvuođa meroštallan lea váttis su buohta, muhto son dovdá iežas goittotge sápmelažžan. Das fuolakeahttá vaikko son orru gávpogis, vaikko sus eai leat bohccot ja vaikko son ii jođe luonddus duoddaris, dahje eale muđuige stereotiippaid mielde. Son eallá ođđaáigásaš máilmmis, ođđaáigásaš sápmelačča eallima, iige su árgabeaivvis sápmelašvuohta earenoamážit oidno. Son lohká goittotge diehtit iežas leahkit sápmelaš, daningo sápmelašvuohta lea su mielas viiddes ja ollislaš ášši, ja maiddái ollu eanet go dušše beare boazodoallu mii lea goittotge eará sámekultuvrra árbevieruid lassin dehálaš ášši. 

Nataliai sámiid áššit leat dehálaččat ja daidda son háliida leat váikkuheamen iežas bealis ja seammás doallamin badjin sápmelaš kultuvrra. Son vásihii iežas etnihkalaš morráneami 16–17-jahkásažžan. Son lei álot diehtán ahte son lei sápmelaš ja diđii iežas sohkaruohttasiid ja ahte su áhkku hupmá nuortalašgiela, muhto duon áiggi son ii vel atnán sápmelašvuođa nu dehálažžan. Son logai vásihan váttisin dan, ahte ii máhttán sámegiela iige eallán árbevirolaš ealáhusain, muhto orui baicce gávpogis ja elii nugo gii beare ruošša. Son muitala goittotge ipmirdan vehá vehážiid sámevuođa máŋggabealatvuođa ja ahte dat ovdána ja hápmašuvvá ođđa áiggi mielde. 

Natalia ii láve geavahit gávtti, iige sus leat goassige leamašan iežas gákti. Jagi 2012 giđđat Davvi-Ruoŧas Björklidenis sámenuoraid oktasaš deaivvadeamis son morihii dasa man fámolažžan gáktekultuvra eallá eará sajiin. Son maiddái fuobmái man unnán son diđii eará biktasiid erohusain. Son lohká, ahte ii ovdamearkka dihte máhte earuhit guđe guvlui miige gákti gullá. Muhto dasage son háliidivččii čiekŋut dárkileappot, ja čiekŋudit iežas dieđu ja dáiddu sámiid duojis. Dán rádjai su masá áidna guoskkahus duodjái lea su sistelávka.

 Ruoššas dušše moattis šat hupmet sámegiela. Vuorrasut olbmot máhttet, muhto siige eai leat šat gallis. Natalia gullá dan sohkabulvii mii lea massán giela. Son ii huma sámegiela, muhto sus lea mokta studeret giela ja earenoamážit nuortalašgiela. Son lea lohkan earret eará suomagiela ja duiskkagiela. Sus lea maiddái plánain boahtit muhtun gaskka Supmii, vejolaččat Anárii studeret. Doppe son sáhtášii ollášuhttit iežas guhkitáiggi niegu studeret nuortalašgiela. Okta su boahttevuođa nieguin lea gárvvásmuvvat muhtin beaivvi nuortalašgiela oahpaheaddjin. Dakko bokte son sáhtášii bealistis leat mielde seailluheamen ja doalaheamen sámekultuvrra.

Govas Natalia Vaskova iežas áhkuin Zoja Nosovain.