Lean Olga Egorova ja lean 24 jagi boaris. Riegádin ja bajásšadden Ruoššas Murmánskka gávpogis. Mánnán ledjen ollu iežan áhku ja ádjá luhtte Loparskajas, 60 kilomehter geahčen Murmánskkas. Mu áhkku lea eret Lujávrris ja áddjá Varzinas.

Bajásšadden sámekultuvrra ja –árbevieruid siste. Mu áhkku earret eará duddjui ollu ja málestii meastá álot árbevirolaš sámi biepmuid. Vázzen skuvllaid Murmánskkas, gos moai leimme oappáin áidna sápmelaččat. Muittán mo mun dollen máŋggaid ovdanbuktimiid sámekultuvrras ja sámiid birra mu luohkáskihpáriidda. 

Vuođđoskuvlla maŋŋá vulgen lonohallanstudeantan Norgii Kárášjohkii vai oahpašin eanet sápmelaš ja norgalaš kultuvrras. Dan maŋŋá lohken hotealla- ja turismasuorggi Murmánskka universitehtas. Bargen ollu dalle go studerejin. 

Go orron Kárášjogas, álgen lohkat davvisámegiela. Dál orun Guovdageainnus ja logan davvisámegiela lassin sámi kultuvrra. Lean doaibman guokte jagi Ruošša sámenuoraid searvvi “Sami Nurash” ságadoallin. Barggan olu bargguid Ruošša sámenuoraid searvvis ja mii dávjá suokkardallat sápmelaččaid boahttevuođa. Dan lassin mun barggan Ruošša Sámedikkis. Astoáigge mun láven duddjot sámedujiid. 

Lean beallái sápmelaš dego stuorámus oassi Ruošša sápmelaččain. Das fuolakeahttá lean álo doallan iežan sápmelažžan inge rievtti mielde máhtášii govahallat eallima sápmelašvuođa haga. Mu eallin livččii sihkkarit álkit danin go dál mus gollá ollu áigi ja resurssat dehálaš sámeáššiide iešguđetlágan čoahkkimiin ja deaivvademiin. Goittotge mun liikon iežan eallimii justa dál ja justa dákkárin, ja doalan dehálažžan sámeáššiid. Lea miellagiddevaš ja dehálaš áddet, ahte mii sáhttit rievdadit boahttevuođa iežamet bargguin, ja mii sáhttit ráhkadit buoret boahttevuođa čuovvovaš sohkabulvii. 

Mu boahttevuohta lea vel vehá eahpečielggas inge dieđe vel mii doppe lea. Gánske dasa gullet bearaš ja mánát ja bargu. Das lean goittotge sihkkar ahte áiggun bargat ain dallege sámekultuvrra ovdii ovdamearkka dihte iešguđetlágan prošeavttain. Oppalohkái oainnán sápmelaččaid boahttevuođa čuovgadin, danin go jus mii rahčat dan ovdii dál, de dorvvastit mii dan seailuma.