Sámenuoraid dáiddadáhpáhusa ordnejeaddjit illudedje das, ahte dáiddadáhpáhus fas geasuhii nu stuorra movttegis nuoraidjoavkku. Heahtá skuvlaguovddáža lihkadanhálla dievai ravddaid mielde go nuorat oahpaheaddjiiguin ja bagadalliiguin buot sámeguovlluin ollejedje dáhpáhusbáikái. Dáiddadáhpahusat leat ordnejuvvon 1970-logu álgojagiid rájes ja dat leat šaddan dehálas arenan sámenuoraide sihke dáiddalaš bargguid ja sámegiela geavaheami olis. Dáhpáhus lea fállán vuosttaš lávddi, gehččiid ja guldaleaddjiid máŋgasiidda dán áigge dovddus sámedáiddariidda. Dáiddadáhpáhus lea movttidahttán nuoraid musihkka- ja teáhterbargguide, dánsumii, govvadáidagii ja čállimii. Dáiddadáhpáhus lea áidna jahkásaš sámegielat nuoraid dáhpáhus Suomas.

Govas leat teáhtergilvvu duopmárat Erkki Hetta, Issát Sámmol Hetta ja Pauliina Feodoroff addimen máhcahaga ja bagadallama Avvila Bohccostallit -jovkui.

Heahtás gaskavahku ja duorastaga 13.-14.3. dollojuvvon dáiddadáhpáhusa váldotemán lei teáhter, mii čuovvu riikaviidosaš Nuorra Kultuvra-dáhpáhusa njuolggádusaid. Sámenuoraid dáhpáhusas lea dasa lassin jahkásaččat earenoamáš sámi temá. Dán jagi dat lei laktojuvvon Áillohačča riegádeami 70-jagi ávvujahkái. Nuorra dáiddarat oassálaste Áillohačča vuoiŋŋas ordnejuvvon govvadáiddagilvui oktiibuot 165 dáiddagovain ja diktačállingilvui oktiibuot 46 davvi- ja anárašgielat divttain.

Govas dánsunteáhterjaovku Spektrolihtat Gáregasnjárggas

Spektrolihtat –joavku lei ieš plánen ja ovttas Merja Pieskiin bagadallan Váimmustan lea dánsun –nammasaš prográmmas. Joavkkus dánsot Alisa Pieski, Mira Pohjanrinne, Katja Haarla, Birit Haarla, Pinja Pieski ja Biret-Inga Pieski.

Avvila vuolleskuvlla sámeluohkáid oahpaheaddjit Bigga-Helena Magga ja Maarit Niittyvuopio leigga bagadallan Bohccostallit –joavkku Čuoikkaid konsearta –nammasaš teáhterbihtá. Joavkkus čájáhallet Ida Grønmo, Sunna Vihervirta, Anna Tervahauta, Fasku-Oskal Magga, Vilho-Simon Mäkinen, Jan-Kristian Magga, Ellenoora Haataja, Sandra Salminen ja Lassi-Olavi Mäkinen.

Spektrolihtat- ja Bohccostallit joavkkut vulget ovddastit sámenuoraid riikaviidosaš Nuorra Kultuvra –dáhpáhussii gullevaš Teatris-festiválii Helssegii miessemánus.

Teáhtergilvvus bálkášuvvui dasa lassin stipeanddain Ohcejotnjálmmi skuvlla 0-3-luohkálaččaid Eallu lea dál gárddis –nammasaš teáhterbihttá, man lei bagadallan Siv Carita Holm. Nubbi stipeanddain bálkášuvvon Silbasuonat –nammasaš joavku ovddastii báikálaš Heahtá skuvlla. Giđa ijat čuovgadat –nammasaš teáhterbihtá lei bagadallan Iŋgá-Máret Gaup-Juuso.

Govvadáiddagilvvus bálkášuvvojedje oktiibuot 12 nuorra dáiddara, main viđas ožžo dasa lassin earenoamáš máinnašumi. Stipeandda ja earenoamáš máinnašumi ožžo Olavi Hetta Vuohčus, Aino-Marja Lampela Dearpmážis, Emil Eliasson Gilbbesjávrris, Elen Ánne Juuso Gárasavvonis ja Elle-Maari Kokkonen Anáris. Stipeanddain bálkášuvvojedje Elle Raudasoja Ohcejogas, Pinja ja Alisa Pieski Gáregasnjárggas, Jasmin Nuorgam Avvilis, Sara Keränen Avvilis, Rosamaria Mattila Gárasavvonis ja Anette Kosonen Vuohčus.

Govas Elle-Maari Kokkonen govvadáiddagilvui oassálastán bargu, mii bálkášuvvui oktan buoremusain.

Sámenuoraid dáiddadáhpáhusa ordnii sámediggi ovttasbarggus Heahtá skuvllain ja Johtti Sápmelažžat -servviin. Čuovvovaš dáhpáhusa temán lea dánsun ja dáhpáhusa ordnenvuorus Soađegilli.