Sámenuoraid dáiddadáhpáhus dollojuvvui njukčamánus Eanodagas Heahtá skuvllaguovddážis. Teáhtera lassin temán lei maiddái Govva ja dikta, masa inspirašuvnna sáhtii gazzat Áillohačča dáiddaláš bargguin. 45 nuorra čállis njealjis čálle anárašgillii ja earát davvesámegillii. Nuortalašgillii ii boahtán dán háve oktage dikta. Nuorra govvadáiddárat bálkkašuvvojedje juo Heahtá dáhpáhusas.

Girječálli ja musihkkár Issát Sámmol Hætta Mázes árvvoštalai logi buoremusa davvesámegielat divttain. Girječálli ja giellačeahppi Ilmari Mattus Anáris fas árvvoštalai buoremusa anárašgielat divttain. Sámediggi juohká nuoraide bálkkašumiid movttiidan dihte nuoraid joatkit iežaset čállima sámegillii.

Anárašgillii čeahpimuš čállin válljejuvvui Avvila badjedási 7. luohká oahppi Iina Kyrö.

Davvesámegielat čálliin bálkkašumiid ožžo čieža Anára skuvlla oahppi: Elna Aikio (4. lk), Siiri Ranttila, Tuomas Vest, Hillá Portti (5. lk), Lifu Torikka (6. lk.), Jenna Portti ja Xia Torikka (8. lk). Ohcejotnjálmmi skuvlla oahppiin bálkkašuvvojedje Sanna Aikio (8 jagi), Tuuli Karekivi (9 jagi) ja Mihkku Laiti (10 jagi).

Sámediggi sávvá nuorra dáiddariidda ollu lihku ja buori geasseluomu ja giitá nuoraid oahpaheaddjiid buori bagadallanbarggu ovddas!