Eamiálbmogiid musihkkadáhpáhus Ijahis ija 10-jagiávvudoaluid olles prográmma almmustahttojuvvo otne. Ávvujagi temán lea Buolvvat ja festivála prográmmafálaldat lea ain maŋggabealát. Ijahis ija jahkelogi áigodaga ávvudit Buolvvat – ávvukonseartas, mii lágiduvvo Sámekulturguovddáš Sajosa auditorios. Konseartas sámimusihkariid sierra buolvvat loaiddastit seamma lávddi alde sámemusihka klassihkkariid ja ođđasut bihtáid. Solistain konseartas lea okta sámemusihka stuoramus násttiin Niko Valkeapää, luohteárbevieru čeahppi Niiles-Jouni Aikio, dovddus sámemusihkar Annukka Hirvasvuopio-Laiti ja nuorra buolvva ovddasteaddji ohcejohkalaš lávlu Sunna Länsman. Konsearta čuojaheamis vástida Ijahis idja joavku, man jođiheaddjin lea guhkesáigásaš musihkar Janne Lappalainen.

Ijahis ija prográmma lea vejolaš čuovvut maiddái live-streama bokte interneahtas. Mannan jagi streama čuvvo sullii 900 geahči birra máilmmi. ijahis ija konsearttain interneahta bokte sáhttá čuovvut goit lávvardaga váldodáhpáhusa, mas gullat sámeartisttaid Suomas, Norggas ja Ruoŧas. Eahkeda álggaha Angelit, geat jagis nubbái rohttejit olbmuid fárrui geasuheaddji dánsunritmmain, juoigamiin ja virkos loaiddasteamiin. Eahkeda joatká Sápmi ja Chukotka -konsearta, mas gullat árbevirolaš luođi, livđe ja leudd ja oahpasmuvvat Veronica Usholik ja Ener-dánsunjoavkku bokte chukotkalaš čottalávlla- ja dánsunárbevieruide. Ijahis ija guldaleaddjiid bidjá johtui Mihá ja gievrra -bihtáin Suoma Sámisge dovddusin boahtán Lovisa Negga. Prográmma loahpaha Norgga joavku Intrigue, man musihkas juoigan laktása áidnalunddot vugiin hardrockii. Bearjadaga mánáid- ja nuoraidbeaivvi Ijahis ija násttážat -konseartas mánáid ja nuoraid iežaset loaiddasteamiid lassin gullat earret eará Máret Hildur Stueng joavkkuinis ja festivála eamiálbmotguossi, chukotkalaš Veronica Usholik. Bearjadat eahkedis Sajosa auditorios gullat Niko Valkeapää konseartta. Eahket joatkašuvvá ČSV -festiválaklubbas, man váldonástin lea Niiles-Jouni Aikio. Siiddas lágiduvvo lávvardaga árbevirolaš Ijahis ija musihkkaseminára, man sáhkavuorut laktásit Buolvvat gávnnadit temái. Lávvardaga klubba eahkedis norggabeal Sámi DJ-duo DJ Šielat čuojaha sápmelaš skearromusihka festiválagussiid illun.

Ijahis ija lágidit ovttasbarggus Anára Sámisearvi ro, Sámediggi, Sámi oahpahusguovddáš, Sámemusea Siida, Giellagas instituhtta, YLE Sápmi, Anára gielda, Sámi mánáidkulturguovddáš, Dáidaga ovddidanguovddáža Lappi guovlodoaibmabáikki, Hotealla Kultahovi, restauráŋŋa Galla Ijahis ija olles prográmma gávdno neahttasiidduin www.ijahisidja.fi.

Lassedieđut:

Anu Magga

+358 50 567 22 04

Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

Anna Näkkäläjärvi-Länsman

+358 295 330 856

Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.