Ovdaolbmo delegašuvnnas ledje mielde vuođđoláhkaválljogotti ságadoalli Johannes Koskinen, hálddahusválljogotti ságadoalli Pirkko Mattila, ruhtaválljogotti ságadoalli Kimmo Sasi, eana- ja meahccedoalloválljogotti ságadoalli Jari Leppä, ekonomiaválljogotti ságadoalli Mauri Pekkarinen sihke riikkabeivviid váldočálli Seppo Tiitinen ja diehto- ja kommunikašuvdnačálli Marjo Timonen. Ovdaolbmo mihtoša mátkki ordnemiin vástidii Lappi lihttu ja mielde ledje maid Lappi lihtu ságadoalli, riikkabeaialmmái Markus Lohi, eatnangoddehoavda Mika Riipi ja oktavuohtahoavda Maiju Hyry.

Ovdaolmmoš Eero Heinäluoma attii riikkabeivviid skeaŋkka sámediggái. Ságadoalli Näkkäläjärvi giittii skeaŋkka ovddas ja lohpidii ahte távval biddjojuvvo dan árvosaš báikái Sajosii. Govva: Johanna Alatorvinen

 Ovdaolmmoš lei hálidan gullat sámedikki oainnuid erenomážit ILO 169-soahpamuša ratifiseremis. Ságadoalli Näkkäläjärvi gieđahalai ságastis viidát Suoma riikkaidgaskasaš geatnegasvuođaid, ILO 169-soahpamuša ratifiserema, Meahcceráđđehuslága ođasmahttima sihke sámediggelága ođasmahttima válmmaštallan bargojoavkku smiehttamuša. Näkkäläjärvi deattuhii ságastis ahte ILO soahpamuša ratifiserema válmmaštallama galgá álggahit dalán, vai ratifiseren geargá riikkabeivviid gieđahallamii. Suomas leat ain buorit vejolašvuođat ratifiseret soahpamuša. ”ratifiseren gáibida politihkalaš dáhtu ja buori oktasašbarggu Suoma stáhta ja sámedikki gaskkas. Soahpamuša ratifiseremii laktásit dušši balut iige dan ratifiseren easttášii mange láhkai eará veahkadaga eallima ja ealáhusaid hárjeheami sámiid ruovttuguovllus” Näkkäläjärvi deattuhii. Sámediggi muitalii ahte sámediggelága ođasmahttima válmmaštallan bargojoavkku evttohusat leat juo dál kompromissat iige daid galgga heajudit lága joatkkaválmmaštallama oktavuođas. Dilálašvuođas ságastallojuvvui maid ruvkedoaimma birra ja dan váikkuhusain sámekultuvrii sihke árktalaš guovllu hástalusain.

Govas gurutravddas olgešravdii Johannes Koskinen, Marjo Timonen, Seppo Tiitinen, Eero Heinäluoma, Jari Leppä, Pirkko Mattila, Kimmo Sasi, Markus Lohi, Mauri Pekkarinen, Klemetti Näkkäläjärvi, Tiina Sanila-Aikio ja Heikki Paltto. Govva: Johanna Alatorvinen.

 ” Sámedikki beales lean ilolaš, ahte ovdaolmmoš ja válljogottiid ságadoallit leat hálidan oahpásmuvvat sámedikki doibmii ja áigeguovdilis sámeáššiide. Riikkabeaivvit lea sámedikki dehálaš oktasašbargoguoibmi ja lea dehálaš, ahte mii beassat lonuhit jurdagiid ja muitalit sámedikki doaimma ja mihttomeriid birra” ságadoalli Näkkäläjärvi muitalii. Sámedikki I várreságadoalli Tiina Sanila-Aikio ja II várreságadoalli Heikki Paltto muitaleigga erenomážit sámi boazodoalu dilis ja rolas sámekultuvrras. Tiina Sanila-Aikio muitalii maid nuortalaččaid sierragažaldagaid birra.

Riikkabeivviid ovdaolmmoš sihke sámedikki ságadoalli Klemetti Näkkäläjärvi ja várreságadoallit Tiina Sanila-Aikio ja Heikki Paltto. Govva: Johanna Alatorvinen.

” Dilálašvuohta lei hui liekkus ja mis lei erenomáš buorre ságastallan ovdaolbmuin ja válljogottiid ságadoalliiguin. Dilálašvuohta lihkostuvai bures guktuid oassebeliid dáfus ja leimmet ovtta oaivilis das, ahte sámeáššiin lea vejolaš beassat ovttas ovddosguvlui positiivvalaš ja buori vuoiŋŋas. Áidna váttisvuohta lei dušše áiggi nohkan gaskan. Sávange ahte mii sáhtášeimmet joatkit ságastallama ja jurdagiid lonohallama vel maŋŋá”, Näkkäläjärvi muitalii.

Sámedikki muittuhančála ovdaolbmui

Klemetti Näkkäläjärvi sáhka

Lassediehtu:

ságadoalli Klemetti Näkkäläjärvi