Nuortalaškulturguovddáš-fidnu ovdána |
![]() |
![]() |
Nuortalaškulturvuođđudusa stivrra čoahkkin dollui Anáris 21.1. Čoahkkimis plánejuvvui nuortalaškulturguovddáža vuođđudeapmi Čeavetjávrái. Dilálašvuhtii oassálaste maiddái sámedikki ságajođiheaddji Klemetti Näkkäläjärvi ja kulturlávdegotti ságajođiheaddji Tauno Haltta. Nuortalaškulturguovddáš ovdanbuktui seammá beaivve maiddái olgoministtar Erkki Tuomiojai Sajosis.
Sámediggi lea álgoplánaid mielde čatnasan láigohit ovtta bargolanja guovddážis. ”Guovddážis lea čielgasit nuortalašservoša doarjja. Mus lei hirbmat álki oassálastit čoahkkimii go sámedikki dievasčoahkkin lea ásahan válgabaji oktan ulbmilin doarjut buot fámuiguin nuortalaškulturguovddáš-fidnu Čeavetjávrái. Seammá prográmmas sámediggi lea čatnasan lasihit gieldaguovddážiid olggobeale guovlluid eallinfámu. Nuortalaškulturguovddáš -fidnus lea sámedikki dievas doarjja”, ságajođiheaddji Näkkäläjärvi muitalii.
Govas sámedikki ságajođiheaddji Klemetti Näkkäläjärvi ja nuortalaččaid luohttámušalmmái Veikko Feodoroff. Govva: Rauno Pietarinen
![]()
Nuortalaškulturguovddáš dárbbaša ruhtadeami guovddáža huksemii, doaimma ovddideapmái ja bajásdoallamii. Nuortalaškulturguovddáža ulbmilin lea ealáskahttit, doalahit ja ovddidit nuortalaččaid kultuvrra ja nuortalašgiela Suomas. ” Nuortalaškulturguovddáža ulbmilin lea fállat lunddolaš nuortalašgielat áššiiddikšun- ja bargobirrasa nuortalaškultuvrra guovddášguvlui. Guovddáža plánen lea juo guhkás ovdánan. Guovddážii lea dárkkuhus sajustit nuortalaččaid giličoahkkima bargguid, sámedikki nuortalašgillii gulavaš doaimmaid, nuortalaškulturvuođđudusa doaibmalanjaid, čoahkkinlanjaid, nuortalašgielat bálvalusaid ja nuortalašgiela giellaguovddáža”, nuortalaččaid luohttámušalmmái Veikko Feodoroff muitalii.
Nuortalaškulturguovddáža válmmaštallá nuortalaškulturvuođđudus, man bargui oassálastet máŋggat guovddáš čanasjoavkkut. Sámedikki ovddasteaddjin nuortalaškulturvuođđudusa stivrras leat kulturlávdegotti ságajođiheaddji Tauno Haltta. ”Guovddáš lea dehalaš nuortalašguovllus ássi buot nuortalaččaide. Buot doaimmaid ii sáhte sajustit Anárii, muhto smávva ja árbevirolaš nuortalašgiliid galgá doallat eallinfámolažžan. Jáhkán ahte guovddáš lasiha nuortalaškultuvrra dovdama ja árvvus atnima”, Haltta muitalii.
Nuortalaškulturvuođđudus lea ohcan eana- ja meahccedoalloministeriijas ruhtadeami guovddáža ollašuhttima várás. Ruhtadeapmi ii leat mieđihuvvon. Nuortalaškulturguovddáš plánejuvvo ruhtaduvvot sierra ministeriijaid, Eurohpá guovlluovddidanfoandda ja eará vejolaš ruhtadangálduid doarjagiin.
Sámedikki stivra gieđahallá čoahkkimis 28.1 latnjadárbbu nuortalaškulturguovddážis.
”In oainne makkárge eastaga dasa, ahte manin sámediggi ii sáhtášii várret guovddážis doaimmahatlanjaid guovtte olbmui. Sámegielaid ealáskahttinprográmma ollašuhttin, sámedikki iežas doaimma ovddideapmi ja davviriikkaid oktasaš sámi giellaovttasbarggu ođđasit organiseren sáhttet buktit sámediggái nuortalašgillii ja nuortalaškultuvrai gulavaš ođđa virggiid”, Näkkäläjärvi muitala.
”Lea vealtameahttun, ahte guovddáža huksemii ja doaimma bajásdoallamii gávdno jođánit bissovaš ruhtadeapmi. Nuortalaškultuvrra sihkkarastin eaktuda jođánis doaimmaid”, Haltta deattuhii.
|