Sámenuoraid dáiddadáhpáhusa duopmárin barggaiga zumbafitness bagadalli Bigga Aikio (govas, geahča video ) Guovdageainnus ja dánsunoahpaheaddji Merja Leinonen Soađegilis. Duopmárat giittiiga Eanodaga powerdancers –joavkku bures válmmaštallojuvvon dánsunčájáhusas, mii oaččui gehččiid fárrui. Koreografia lei máŋggabealálaš ja earenoamážit Sámi leavga, mii šattai dánssa loahpas dánsuid biktasiin, oaččui giitosiid. Dánssa lei bagadan Rosa Pietikäinen ja das dánso Britt-Inger Ruotsala, Susan Löf, Anni-Sofia Löf, Kristen Anne Ruotsala, Petra Ikonen ja Sofia Kallionlähde.

 

 

 

 

 

 

 

 

 

 

 

 

 

 

 

 

Soađegili Jutatokka (govas vulobealde) dánssa namma lei Boazu. Čájáhus oaččui giitosiid buori ritmmas, njuovžilis lihkádusain ja mágihkalaš dovddus. Dánsa govvidii duopmáriid mielas bures bohcco dakkárin go dat lea okto ja ealu siste. Lassegiitosiid ožžo persovnnalaš vuogis atnit vuoddagiid čájáhusas. Dánssa lei bagádallan Riina Lindberg ja das dánso Ada Heikkilä, Nella Nikula, Elina Pulkkinen, Lotta Tervo, Eliisa Vaarala ja Laura Kaaretkoski.  

 

 

 

 

 

 

 

 

 

 

 

 

 

 

 

 

Gudnemáinnašumi ja stipeandda ožžon Giehtaruohttasa mánát –joavkku (govva vulobealde) lei bagadallan Gárasavvona skuvlla oahpaheaddji Taina Syväjärvi. Čájáhusas lei fárta ja mokta ja sámi kultuvra lei oidnosis. Dasa lassin joavku oaččui buori oktavuođa gehččiiguin.

 

 

 

 

 

 

 

 

 

 

 

 

 

 

 

 

Gudnemáinnašumi ja stipeandda oaččui maid káregasnjárgalaš nuoraid Gangstajuŋkkát hiphop-joavku dánssain Trift Shop. Dánssa lei bagadallan Ville Köngäs, dat movttiidahtii gehččiid, das lei buorre ritma, soai dánsuiga bures oktii ja koreografia lei buorre.

 

Sámenuoraid dáiddadáhpáhus ordnejuvvui vuosttaš geardde Soađegili girkosiiddas. Dáhpáhus gullá oassin riikaviidosaš Nuorra Kultuvra (Nuori Kulttuuri)  –dáhpáhussii ja dan váldoordnejeaddjin doaibmá sámediggi. Soađegili dáhpáhussii oassálaste oktiibuot badjel 400 olbmo ja gilvui oassálaste 12 dánsunjoavkku.  

 

 

 

 

Jagi 2015 sámenuoraid dáiddadáhpáhus ordnejuvvo Ohcejogas ja dan riikaviidosaš temán lea musihkká. Sápmelaš temás dieđihuvvo maŋŋelis. Soađegili dáhpáhusa oassin lei maid govvagilvu, man bálkášumit juhkkojuvvojit skuvllaid giđđafeasttain.  

Govat Mika Saijets.