| Mari Boine konsearta borgemánu Ijahis ijas |
|
|
|
Ijahis idja –eamiálbmogiid musihkkadáhpáhusa dánjagaš váldonásti lea norggasápmelaš Mari Boine musihkkajoavkkuinis. Máilmmi beakkánamos sápmelažžan gohčoduvvon Boine loaiddasta dáhpáhusas diimmu guhkkosaš olgoáibmokonsearttas lávvardateahkeda. Boine ovttasta iežas musihkas nana ja erenoamáš vugiin jazz, folk, blues, máilmmemusihka sihke juoigama. Lávlagiinnis Boine váldá beali politihkkii sihke servodaga albmonemiidda, ja gieđahallá áššiid, mat leat sámiide dehálaččat.
Boine ii nuorran atnán árvvus sámemáttuidis iige máhttán gáhttet sámegiela dahje kultuvrra. Easka jagi 1981 beaggán Alta-joga stuibmi oaččui Boine morihit sápmelašvuhtii, ja bealuštit álbmogis vuoigatvuođaid sihke buktit albmosii sámiid vásihan eahpevuoiggalašvuođa iežas musihka bokte. Vuosttas skearru , Jaskatvuođa maŋŋá, Mari Boine almmuhii jagi 1985, man maŋŋá son lea bádden ovcci skearru. Jagi 2012 Boinei juolluduvvui Norgga stáhta 11-jagaš dáiddárstipeanda, man vehkiin son ráhkada ee. ođđa skearru ja návddaša áiggis ruovttuguovllustis Davvi-Norgga Porsáŋggus.
Anára girkosiiddas lágiduvvon Ijahis idja lea áidna sámemusihka festivála Suomas ja dat lea stáđásmahttán báikki oktan dehálamos Davvi –Sámi geassedáhpáhussan. Diimmá dáhpáhus čohkkii Sámekulturguovddáš Sajosii guovtti beaivvi áigge eanet gehččiid go goassige ovdal. Oktanuppelogát geardde lágiduvvon Ijahis ija prográmma lea vuot viiddis ja máŋggabealat. Festivála prográmmii gullet sihke árbevirolaš sámemusihka čehpiid loaiddasteamit, šaddi sámeartisttaid konsearttat, mánáid prográmma, eamiálbmotgussiid musihkkaloaiddasteamit ja sámemusihka klubbaeahkedat. Dáhpáhusa dánjagáš temá lea ”Jávrebiekkat”, man ulbmilin lea čalmmustahttit sámeunnitloguid dahjege nuortalaš- ja anárašsámiid sihke sin musihkka- ja dánsaárbevieru. Dáhpáhusa eamiálbmotguossit bohtet dán jagi Chukotkas, Sibirjjás, man lassin festivála oahpásmahttá gallejeaddjiid maiddái oarjje-afrihkkálaš musihkka- ja dánsaárbevieruide. Ijahis ija prográmma almmustahttojuvvo ollásit geassemánu beallemuttus dáhpáhusa neahttasiidduin.
Ijahis ija lágidit oktasašbarggus Anára Sámisearvi ro, Sámediggi, Sámi oahpahusguovddáš, Anára gielda, Dáidaga ovddidanguovddáža Lappi doaibmasadji, Yle Sápmi ja Hotealla Kultahovi.
Lassidieđut:
Anu Magga +358 50 567 22 04 Anu Magga +358 50 567 22 04 |