Vuoigatvuođaministeriija mielde ráđđehusa evttohus addojuvvo riikkabeivviide nu jođánit go vejolaš. Riikkabeaivvit gieđahallet ráđđehusa evttohusa čakčat. Juos dárbu lea, sáhttit láhkii dan riikkabeaivvegieđahallama oktavuođas evttohit váldojuvvot dárbbašlaš sirdásanasáhusaid jagi 2015 válggain heivehuvvon válgalogahallamiid ohcaleami ja válgalogahallama nannema guoskavaš mearreáiggiin ja eará vejolaš válggaid doaimmaheapmai laktáseaddji áššiin. ”Lean sihkkar das, ahte sámeservoša ja sámedikki dorjon sápmelašmeroštallan boahtá fápmui ovdal válggaid ja sámediggi gieđahallá ohcamušaid sámedikki válgalogahallamii ođđa meroštallama vuođul”, sámedikki ságajođiheaddji Klemetti Näkkäläjärvi muitala. 

” Sámedikki áddejumi mielde ráđđehusa evttohusa ii leat dárbu gieđahallat eará váljagottiin go vuođđoláhkaváljagottis. Sámedikki ulbmilin lea, ahte lága riikkabeaivvegieđahallan livččii johtil, láhkii ii boađašivčče eará nuppástusat go vejolaččat sirdásanásahusaid oasil ja lunddolaččat buktit dán doaivaga ovdan vuođđoláhkaváljagoddái.”, sámedikki ságajođiheaddji Klemetti Näkkäläjärvi muitala. 

Sámedikki válgalávdegoddi lea álggahan válmmaštallama sámedikki válggaid várás. ”Vuordit dieđusge ahte ođđa sámediggeláhka boađášii fápmui nu jođánit go vejolaš. Dilli lea midjiide hástaleaddji. Gártat álggos doaibmat boares sámediggelága vuođul, muhto seammás maid ráhkkanit ođđa lága buktin ođastusaide. Čuovvut álo guđege fámus leahkki láhkaásahusa ja dan mearreáiggiid. Čuovvut lága riikkabeaivvegieđahallama ja daid váikkuhusaid. Láhkaásaheami gáibidan mearrádusaid válgalogahallama nannemis dahkat goas ain fámus leahkki lága ja mearreáiggiid mielde. Dakkár dilli ii sáhte šaddat, ahte válgalogahallamii váldojuvvošedje olbmot seammaáigásaččat dálá sápmelašmeroštallama vuođul ja ođasmahttojuvvon sápmelašmeroštallama vuođul, ”válgalávdegotti ságajođiheaddji Janne Näkkäläjärvi muitala. 

Sámedikki válgalávdegoddi dieđiha sámiide sámedikki ruoktosiidduin ja medias sámedikki válgalogahallamii ohcaleamis ja vejolaš nuppástusain, maid sámediggelága ođastus buktá. ” Válgalávdegoddi fuolaha das, ahte sámit ožžot áiggil dieđu ja  válgalogahallamii ohcaleamis, válggaid lágideamis ja evttohasásaheamis sáme-ja suomagillii.  Válgalávdegoddi fuolaha maiddái sámiid vuoigatvuođadorvvus válggaid lágideami  oktavuođas.  Jienastanbiillat bohtet maiddái válggaide ja sáhttit bálvalit jienasteaddjiid ain buorebut, ” válgalávdegotti ságajođiheaddji muitala. 

Sámediggi álggaha ráhkkaneami sámediggelága buktin ođastusaide. ” Ođđa sámediggeláhka gáibida sámedikki bargoortnega dárkkisteami ja oasi nuppástusain galgá dahkat hohpolaččat válggaid guoski asáhusaid geažil. Oppalaš ođastus galgá leat fámus ja dohkkehuvvon go jagi 2015 válljejuvvon sámedikki álggaha doaimmas. Ođastusas gullat bargoveaga, ”sámedikki ságajođiheaddji Näkkäläjärvi muitala. 

” Sámedikki válgalávdegotti čoahku ja válljenákkaid evttohuvvo ahte dat  nuppástuhttojuvvojit ođđa lágas. Lea nappo hui vuorddehahtti, ahte sámediggi gártá ásahit ođđa válgalávdegotti ollašuhttit válggaid ođđa láhkašasáhusa vuođul ja sámediggi galgá ráhkkanit gieđahallat ášši hui jođánit, dađi mielde mo riikkabeaivvegieđahallan ovdána ” válgalávdegotti ságajođiheaddji Janne Näkkäläjärvi muitala.

Lassidieđut: Válgalávdegotti barggu oasil válgalávdegotti ságajođiheaddji Janne Näkkäläjärvi

Muđuid sámedikki ságajođiheaddji Klemetti Näkkäläjärvi