. ”Sámediggi lea hirbmat ilolaš, ahte bealuštusministaras lei áigi máilmmipolitihkalaš kriissaid siste galledit sámiid ruovttuguovllus. Erenomáš ilolaš lean das, ahte son válljii galledanbáikin mu ruoktoguovllu”, sámedikki ságajođiheaddji Klemetti Näkkäläjärvi muitalii. 

Deaivvadeami fáddán lei ráđđehusprográmma sámiid guoski ulbmiliid ja geatnegasvuođaid ollašuvvan. Bealuštusministtar Haglund ja ságajođiheaddji Näkkäläjärvi gávnnaheigga duđavažžan, ahte vaikke riikkabeaiáigodat lahkona loahpa ja álgu lei váttis, ráđđehusprográmma sámiid guoski ulbmilat leat ollašuvvamin dievasmearálaččat.  ”Dát lea sámiid dáfus oalle historjjálaš, dasgo ovdal leat ožžon lohpádusaid, muhto dat leat báhcán ollašuvakeahttá. Ráđđehusprográmmas eai leamaš goassige ovdal  ná máŋga sámiid guoski ulbmila ja dat orrot ollašuvvamin dievasmearálaččat”, ságajođiheaddji Näkkäläjärvi muitala. 

”Ráđđehusprográmmas ledje hárvenaš nana ulbmilat sámeáššiid ovddideami várás. RKP lea čatnasan daid ollašuhttimii jo ovddit válgakampánjjas ja dieđusge maiddái ráđđehusráđđádallamiin. Dál ulbmilat leat ollašuvvamin buotláhkai ja dat čájeha, ahte RKP:i sáhttá luohttit. Dan man lohpidit, geahččalit maiddái deavdit” gávnnaha RKP ságajođiheaddji, bealuštusministtar Carl Haglund. 

Eamiálbmogiid sajádat lea nannejuvvon justa dál globála dásis eamiálbmogiid máilmmikonfereanssa loahppaáššebáhpára dohkkeheami mielde. Loahppaáššebáhpára prinsihpat leat maiddái máilmmiráfi ovddideaddji ášši. Eamiálbmogat sáhttet geavahit riekte- ja riidduidčoavdinvuogádagaid servošiid siste muhto maiddái viidásabbot servodagas. Stáhtat čatnasit konsulteret ja bargat ovttasbarggu eamiálbmogiiguin sin iežasat parlamentáralaš orgánaid bokte. Ovttasbarggu ulbmilin lea oažžut eamiálbmoga eaktodáhtolaš, ovddalgihtii addon dihtui vuođđudeaddji dohkkeheami man beare sin árbevirolaččat ásson eana- ja čáhceviidodagaide dahje eará resurssaidda guoski fidnu dohkkeheapmái. Maiddái álbmotlaš dási čovdosiin sámeáššiin ekonomalaš eahpesihkkarvuođa siste galget leat čielga sigŋálat, ahte eamiálbmogiid, Suomas sámiid, sajádaga nannen lea maiddái linjjás dáid globála prinsihpaiguin ja ovddida áddejumi (ja dorvvolašvuođa) sámiid ja stáhta gaskkas. 

”Dát lea dehalaš lávki ovddos ja lean oalle ilolaš das, ahte eamiálbmogiid sajádat dorvvastuvvo maiddái riikkaidgaskasaččat. Álbmotlaččat dán barggu galgá joatkit maiddái boahtte ráđđehusbaji áigge, gávnnaha bealuštusministtar Haglund. 

”Ovttasbargu suomaruoŧŧelaččaiguin ja sápmelaččaiguin leamašan njuovžil ja oalle dehalaš goappat álbmogii. Leat hirbmat ilolaččat ovttasbarggu lávgamis. Álbmotlaš vehádagaide lea dehalaš doarjut guđet guoimmi ja maiddái vehádagaid vuoigatvuođaid ja vuoigatvuođa iežaset gillii ja kultuvrrai. Ovttasbarggu lea buorre joatkit”, bealuštusministtar Haglund ja ságajođiheaddji Näkkäläjärvi gávnnaheigga. 

Ministtar oahpásmuvai galledeami olis maiddái Eanodaga lundui ja bivdokultuvrai. Eanodaga boazosámit ja sámediggi adde bealuštusministtarai čearpmaha skeaŋkan, mas lea elektrovnnalaš čeabebáddi. Eanodaga boazosámit leat skeŋken Monaco fursta Albertii čearpmaha su galledeami olis Eanodagas jagi 2012. Ministtar Haglund boazu guohtu seammá Jávrrešduoddara siiddas go fursta  Albert boazu. Sámi oahpahusguovddáža vd. rektor Janne Näkkäläjärvi fuolaha teknihkalaš ordnemiin nu, ahte bealuštusministtar sáhttá čuovvut bohcco eallima dihtora bokte.

Lassidieđut:  Sámedikki ságajođiheaddji Klemetti Näkkäläjärvi, 050-5242109

                  Ministtarjoavkku sierraveahkki Malin Brännkärr, 040-5347727