Sámediggi ja Oulu universitehta Giellagas-instituhtta álggahit sámi oahpahusa bargiide oaivvilduvvon guđa oahppočuoggá skuvlenprošeavtta. Skuvlejupmi álgá Sámi kultur-guovddážis Sajosis Anáris guovvamánus 2015. Skuvjejumi váldotemán lea giellalávgunmetoda heiveheapmi sámeoahpahussii

Skuvlejupmi lea vuosttažettiin fikkahuvvon vuođđooahpahusa sámegiela ja sámegiel luohkáid oah-paheaddjiide, muhto skuvlejupmái besset maid sámi smávvamánáid bajásgeassima bargit, logahaga sámegiela oahpaheaddjit ja sámi fidnooahpahusa oahpaheaddjit. Sámedikki skuvlen- ja oahppomate-riáladoaimmahat koordinere skuvlejumi ja hálddaša stáhtadoarjaga. Ovttasbargoásahussan oah-pahusas leat maid Vaasa universitehta giellalávguma ja máŋggagielalašvuođa guovddáš ja Sámi al-laskuvla.

Oahpahusdoaimma bargiidskuvlejupmi ordnejuvvo njealje geardde guovtte beaivve kontáktaoah-pahussan Anáris Sámi kulturguovddážis Sajosis. Vuosttas čoahkkaneapmi lea guovvamánus 2015, nubbi giđđat 2015 ja goalmmát ja njealját deaivvadeapmi čakčat 2015.

Skuvlenbeaivvit sisdollet teoriijalogaldagaid ja bagadallon bargobádjebarggildanbeivviid. Bar-gobádjebeivviid áigge buvttaduvvo girjjálaš materiála, man vuođul almmuhuvvo prošeavtta loahp-pabuvttan sámeoahpahusa idea- ja bagadallangirji. Bagadallangirji almmuhuvvo sáme- ja suomagillii.

Skuvlejupmi mii gieđahallá sámi giellalávguma oahpahusas, doarju sihke eatnigiel ja eará oahppiidge go eatnigielagiidda addojuvvon sámegielat oahpahusa. Giellalávgunoahpahusa figgamuššan lea nan-net gielalaččat iešguđet dási oahppiid sámegiela ja nannet aktiivvalaš ja birgehalli guovttegielalaš-vuođa. Sámeoahpahus pedagogalaš gárggiidahttin mearkkaša ee. oahpaheaddjiid fidnodáidduid buorideami nu ahte sii máhttet buorebut go ovdal váldit oahpahusas vuhtii gielalaččat ja kultuvrra-laččat heterogenalaš oahppiid joavkku. Juohke oahppi galggašii oažžut skuvllas buriid vejolaš-vuođaid buoridit iežaset sámegiela máhtu ja bajásšaddat iežaset kultuvrii.  

Skuvlejumi figgamuššan lea addit oahpaheaddjiide vejolašvuođa sámegiela ealáskahttimii skuvlen-barggus, fállat sidjiide barggildanarena ja gaskaomiid ovddidit giellalávgunoahpahusa geavatlaš skuvlabarggus. Nubbin dehalaš figgamuššan lea ráhkkanit váldit vuostá ovda- ja vuođđooahpahusa ođđa oahppoplánaid sámeoahpahusas. Skuvlejumi ulbmilin lea oččodit čavgadabbo dieđuidlonohal-langeavadiid ja lasihit oahpahusbargiid dieđu daid sámeoahpahusa vejolašvuođaid geavadis maid láhka addá.

Guhkes gaskkaid dihte sámeoahpahusa ja smávvamánáid bajásgeassima bargiid deaivvademiid lea leamaš váttis ordnet gielddarájiid rastá. Dán oahpahusdoaimma bargiid skuvlenprošeavtta olis lea vejolašvuohta buhtadit oasseváldiid mátkegoluid dađe mielde go mearreruhta luoitá.

Sámeoahpahusa bargiidskuvlejupmái sáhttá almmuhit iežas vuossárgga 24.11.2014 rádjai juogo šleađgapoastta bokte dahje riŋget: Irmeli Moilanen (irmeli.moilanen(at)samediggi.fi / 050-5691255). Almmuheapmi lea čadnevaš. Skuvlejumi ruhtada Oahpahusráđđehus.

Oahppogurssat, daid sisdoalut ja vuosttas deaivvadeami prográmma lea oaidnimis Sámedikki ja Giellagas-instituhta neahttasiidduin: www.samediggi.fi ja www.oulu.fi/giellagasinstituutti/

Skuvlenplána

Lassidieđut:

GIELLAGAS -INSTITUHTTA
                
Doseanta, FT Marja-Liisa Olthuis        Hoavda Anni-Siiri Länsman
marja-liisa.olthuis(at)oulu.fi         anni-siiri.lansman(at)oulu.fi

SÁMEDIGGI

Má. skuvlenčálli Irmeli Moilanen (30.11.2014 rádjai)
irmeli.moilanen(at)samediggi.fi
tel. + 358 (0) 10 839 3163