Sámedikki čoahkkima mearrádusat |
![]() |
![]() |
Sámediggi mearridii, ahte boahttevuođas sámedikki čoahkkimat striimejuvvojit interneahtas. Vuolggahusat sámedikki almmolaš čoahkkimiin leat čuovvumis interneahtas njuolggosáddagin.
Evttohusa sámedikki čoahkkimiid striimemis lea bargan sámedikki nuoraidráđđi. ”Lean ilus, ahte sámenuorat leamašan aktiivvalaččat. Dál juksat striimema bokte maiddái Anára olggobealde ja sámiid ruovttuguovllu olggobealde ássi sámiid ja čoahkkimiid čuovvun álkidahtto. Striimen lasiha sávvamis dieđu sámedikki doaimmas viidásabbotge” ságajođiheaddji Klemetti Näkkäläjärvi kommentere mearrádusa.
Sámedikki I várreságajođiheaddji Tiina Sanila-Aikio ovdanbuvttii čoahkkimii ON:id eamiálbmogiid máilmmikonfereanssa loahppaáššebáhpára. Loahppaáššebábir merkejuvvui čoahkkimis diehtun. ” Loahppaáššebáhpáris stáhtat nannejit čatnasumi ON:id eamiálbmotjulggaštusa ollašuhttimii. Dát dárkkuha dan, ahte ON:id eamiálbmotjulggaštusas lea šaddamin ain eanet čadni áššebábir riikkaidgaskasašpolitihkalaččat ja maiddái juridihkalaččat” Tiina Sanila-Aikio čilge.
Sámedikki čoahkkin ráhkkanii sámediggelága fápmuiboahtimii. Sámediggelága ođastus vejolaččat boahtá fápmui jagi 2014 loahpas dahje 2015 álggus. Lága sirdásanáiggit sáhttet doalvut dasa, ahte válgalogahallama dievasmahttima vuigengáibádusgieđahallan dáhpáhuvvá hui johtilis áigetávvaliin. Ođđa lága mielde vuigengáibádusat válgalogahallama dievasmahttimis dahkkošedje sámedikki čoahkkimii (26 §). Válgalogahallama ja vuigengáibádusmeannudeapmi sáhttet eaktudit stivrras ja dievasčoahkkimis badjelmearálaš čoahkkimiid ja čoahkkimiid johtilis čoahkkái bovdema. Vuigengáibádusaid galgá gieđahallat daid luonddu dihte hui johtilit, ammes ohcciid vuoigatvuohtadorvu gártta vára vuollái. Dan dihte čoahkkin mearridii rievdadit sámedikki bargoortnega 56 § nu, ahte dálá 10 beaivve sajis čoahkkima áššelisttu galggašii sáddet sámediggelahtuide maŋimustá 7 beaivve ovdal čoahkkima. Nuppástus ii eretváldde dan vejolašvuođa, ahte čoahkkinbovdehusaid ja áššelisttuid ii sáhtášii sáddet dán árat.
Jagi maŋimuš sámedikki čoahkkin dollo juovlamánus. Dalle áššelisttus lea ee. sámedikki bušeahtta-doaibmaplána dohkkeheapmi jahkái 2015.
|