Sajosa klubieahkeda plánemat leat fas jođus ja njeallját klubieahkeda ávvudat bearjadaga 12.12.2014 diibmu 20.00 rájes. Klubieahkeda áigge oažžut návddašit nu buori sámemusihkas go lotkes populáramusihkage.

Lávddi ala leat lohpidan ee. Out of the Woods, Aila-duo, Ravggon, Tiina Aikio ja Tony Brandtberg, Janne Lappalainen ja Katri Kittilä sihke Ánnámáret Ensemble. Go oaidná earáid lávddi alde, de sáhttá alddisge buollát mokta loaiddastit. Dalle oažžu gii beare gorgŋet lávddi ala ja geahččalit geasuhit guldaleaddjiid beallásis. Sajosa albma buorre čuojanasat leat muddejuvvon ja mikrofovdna vuordá su, geas lea miella rohttet vaikkoba luođi! Dárbbu mielde oažžu restoráŋŋa Lyemes juoidá njálmmeguvlui. Klubieahkeda jođiheaddjin lea Sohkaršohkas dovddus jođihanbárra Heli Huovinen ja Aslak Paltto.

Bileahttavuovdin Sajosis álgá diibmu 20.00 ja bileahtta klubieahkedii máksá 10e. Bileahttaid sáhttá oastit maid ovddalgihtii Sajosa infos. Buresboahtin!

Klubieahkeda lágidit: Sajos, Sámemusihkkaguovddáš, Sámi oahpahusguovddáš ja Restoráŋŋa Lyeme.

Lassedieđuid:

Tämä sähköpostiosoite on suojattu roskapostia vastaan, aseta javascripttuki päälle nähdäksesi osoitteen.

tel. 358-(0)10 839 3109