Ulbmilin dáinna temáin lea dahkat dovddusin Enodaga ja eará oarjjábeali guovlluid luohteárbbi ja maiddái ođđasut sámemusihka. Vilda duoddarat gullojit Ijahis ija konsearttain, mat ordnejuvvojit sihke sámekulturguovddáš Sajos šilljui ceggejuvvon festiválaguovllus ja Sajosa stuorra auditorias. Festiválavahkkolohppii gullá maid árbevirolaš mánáid ja nuoraid beaivi bargobájiiguin ja konsearttain, sámemusea Siiddas ordnejuvvon musihkkaseminára ja klubbaeahkedat, main sámemusihkka lea guovddážis.

Ijahis ija lágidit ovttasbarggus Anára Sámisearvi ry, Sámediggi, Sámiid oahpahusguovddáš, YLE Sápmi, Anára gielda, Dáidaga ovddidanguovddáža Lappi doaibmasadji, Sámemusea Siida, restauráŋŋa Lyeme, ja Hotealla Kultahovi. Lassidieđuid dáhpáhusas gávdnojit festivála facebook- siidduin sihke dáhpáhusa iežan neahttasiidduin čujuhusas: www.ijahisidja.fi