Sámedikki čoahkkin dohkkehii jagi 2015 bušeahta. Aitosaš doaimma boađut leat 2,738 miljovnna euro. Bušeahtta lea nollabušeahtta, nuppiid sániiguin golut leat seammá olu go boađut.  Sámedikki válggaid bušeahtta lea 250 000 euro. 

Sámedikki aitosaš doaimma goluin 47 % leat bargoveahkagolut. Politihkalaš doibmii ja čoahkkimiidda lea várrejuvvon 11 % aitosaš doaimma bušeahtas. Láigogolut leat 21 % bušeahtas. Eará golut leat 21 %, mat sisttis dollet ee. hálddahusgoluid. Sámedikki aitosaš doaimma  ruhtadeamis 78 % boahtá vuoigatvuohtaministeriijas, 4,8 % oahpahus- ja kulturministeriijas, 15 % lea vuoigatvuohtaministeriija láigodoarjja ja 2,2 % leat iežas doaimma boađut. 

Sámediggi juohká stáhtadoarjagiid sámegielat sosiála- ja dearvvasvuohtabálvalusaid ja árrabajásgeassinbálvalusaid buvttadeapmái sihke  sámegielat oahppamateriálabuvttadeapmái ja sámi kulturbálvalusaide 2,234 miljovnna euro. Sámedikki sierranasprošeavttaid boađut ja golut leat 391 000 euro. Sajosa bálvalanovttadaga bušeahtta lea 1,267 miljovnna euro. 

Bušeahttajagi boahtun ja stáhtadoarjjan lea árvvoštallon oppalaččat 6,615 miljovnna euro. Sámedikki bušeahtas boađut leat 9,36 % eanet go jagi 2014 bušeahtas. Boađuid lassáneapmi boahtá váldoáššis sámedikki válggain ja daid sierranasruhtadeamis. 

Sámediggi ásahii gávcci váldoulbmila bušeahttajahkái 2015. Váldoulbmilin lea sámedikki válggaid ordnen. Ovddugohcima guoskevaš ulbmilat gusket ILO 169-soahpamuša ratifiserema, oassálastima ráđđehusráđđádallamiidda, sámegielaid ealáskahttinprográmma ollašuhttima ja davviriikkalaš sámesoahpamuša dohkkeheami. Sámedikki hálddahusa ja iežas doaimma njunušulbmilin ásahuvvojedje sámedikki bargoortnega ođasmahttin ja bargoveahkahálddahusa ovddideapmi. Sámediggi dohkkeha bušeahttajagi sohkabuolvaprográmma sihke lágida sámiid servvolašvuođa doarju, sámekultuvrra mieldásaš sámiid álbmotbeaivve ávvudeami 6.2.2015 Anáris ja ávvudeapmi maiddái striimejuvvo. 

Dievasčoahkkin dohkkehii lassin dárkilis sektorguovdasaš ulbmiliid ja daid bušeahtaid ee. ovddugohcima, gielalaš vuoigatvuođaid, sierranasprošeavttaid ja Sajosa bálvalusovttdaga oasil.   

Sámedikki čoahkkin nammadii sámedikki nuoraidráđi várrelahttun, earu bivdán Anna-Katariina Feodoroff sadjái,  Leena Fofonoff. 

Sámedikki čoahkkima internetvuolggahusa čuvvo 179 geahčči.