Samediggi - Saamelaiskäräjät - ANÁRA MÁRKANIS BUOTLÁGAN PROGRÁMMA SÁMIID ÁLBMOTBEAIVVE 6.2.2015

Anára márkana doaibmit leat čohkken searaideaset ja dahkan oktasaš prográmma sámiid álbmotbeaivvi ávvudan dihte. Álbmotbeaivvi prográmmas gávdno sámekultuvrra oppa girjáivuohta. Fálus leat musihkka, filmmat, govvadáidagat, muitalanárbi, bohccot, fitnodatvuoigŋa ja erenoamáš buorit loaiddasteaddjit! Maiddái buot Suomas hállojuvvon sámegielat leat váldojuvvon vuhtii. Prográmma bistá iđedis gitta eahkedii ja lea oaivvilduvvon buotahkásaččaide! Buresboahtin návddašit álbmotbeaivvi prográmmafálaldagain ja ilolaš ovttasorrumis!

Siiddas leat rabas uvssat dbm 9-17. Siidda šilljobirrasis lea álbmotbeaivvi rahpandilálašvuohta ja dalle ee. gessojuvvo leavga stággui. Sámemusea rahpá iežas ođđa oktasaščájáhusa Sámenuoraid dáiddadáhpáhus oahpisin álbmotbeaivedoaluid álggaheami gudnin. Sámi Oahpahusguovddáža oahppit leat dahkan viiddis ja máŋggabealat kulturprográmma Siidii.

Kultuguovddáš Sajosis álgá kulturprográmma juo iđit rájes. Sajosis lea maiddái Sámi Oahpahusguovddáža buvttadan prográmma. Maiddái Anára beaiveruovttus lea iežas prográmma álbmotbeaivvi ávvudan dihte. Sajosis leat rabas uvssat ja dálu doaibmit muitalit juoidá iežaset birra.

Sámediggi ávvudišgoahtá álbmotbeaivvi Sajosis dbm 15.30 rájes mánáid heargevuodjimiiguin. Álbmotbeaivekáffe guossohuvvo dbm 16.00 ja álbmotbeaivvi virggálaš ávvudeapmi lea dbm 17.00-19.00. Guoibmás kultuvrralaš eahketdoaluide leat buohkat buresboahtán!

Álbmotbeaivvi doaluide lea Anára márkanis juo guhká gullan maiddái Anára searvegotti ja SámiSostera lágidan boradanboddu searvegottedálus ja girkostallamat Álbmotbeaivvi bismameassu lea Anára girkus dbm 15.00.

Anára álbmotbeaivedoaluid lea čuovvumin oppa beaivvi Yle Sápmi, man ovttasdavviriikalaš sáddagat álget juo iđit rájes dbm 7.10. Erenoamáš máinnašupmin gánneha muitalastit ahte Andte Gaup-Juuso lea Yle Oddasat -sáddaga ođaslohkkin dbm 15.10 Yle TV1:s!

Buresboahtin Anárii

Álbmotbeaivvi doaluid leat lágideamen: Sámi Oahpahusguovddáš, Sámemusea Siida, Sámediggi, Yle Sápmi, SámiSoster, Anára searvegoddi, Sámearkiiva, Anára gielda/Anára skuvla ja beaivedikšu.

Lassedieđut ja dárkilis prográmmat gávdnojit siidduin: www.siida.fi , www.samediggi.fi, www.sogsakk.fi