Nákkus: Sámeservošii boahtti dárbbaša sosiála ja kultuvrralaš oaiveopmodaga
Juohke servošis leat iežas njuolggadusat, dábit, árvvut ja fierpmádagat. Sámeservošii boahttis leage dárbu oahpahallat earret eará sámegiela ja iešguđetlágan árgabeaivvi doaimmaid degomat giehtadáidduid, borramuškultuvrra ja gárvodanvieruid. Bohttiin šaddetge dávjá máŋggakultuvrramáhttit, geat bastet doaibmat guovtti kultuvrra dulkan, boahtá ovdan FL Outi Korpilähde varas nákkosdutkamušas.
Servošat dábálaččat suodjalit rájáideaset, eaige boahttit sáhte leat vásitkeahttá ruossalasvuođaid. Son galgá juksat vuos joavkku dohkkeheami. Sámeservoša suopmelaš nissonat leat aktiiva doaibmit go háhket dárbbašlaš sosiála ja kultuvrralaš oaiveopmodaga. Outi Korpilähde mielde sis šaddet máŋggakultuvrramáhttit, geat bastet doaibmat guovtti kultuvrra, suopmelaš ja sápmelaš, rájá alde muhtinlágan kulturdulkan.
Korpilähde dutkkai dutkamušastis suopmelaš nissonolbmuid sajáiduvvama sámeservošii sápmelaš albmáid eamidin ja bearrašiid lahttun. Son dutkkai makkár kultuvrralaš ja sosiála oaiveopmodaga boahtti dárbbaša, nappo makkár dieđuid ja dáidduid boahttis lea dárbu oahppat ja mo hukset fierpmádaga vai livččii servoša lahttu. Dutkamuša materiálan leat buohkanassii 33 Suoma sámeguovllu orru suopmelaš nissonolbmo jearahallama.
Árgga doaimmat sámi vuogi mielde
Sámeservoša suopmelaš eamidat geahččalit aktiivvalaččat háhkat dárbbašlaš dáidduid ja iešvuođaid, vai searvvuš sáhtášii dohkkehit sin servoša lahttun. Outi Korpilähde mielde suopmelaš guoimmit geahččalit juksat sámi vuogi, nappo doaibmat ja eallit seamma láhkai go sámeservošis ellet, vajáldahtekeahttá dan kultuvrra gos sii leat vuolgán.
Korpilähde mielde sámeservoša suopmelaš eamidiid doaibman huksejuvvo árgabeaivvis ja árggabeaivvi doaimmain. Nissonolbmot ráđđádallet heivvolaš dábiin, áiggi geavaheamis, oktavuođain fulkkiide ja eará servošii. Ođđa borramušat, gávtti geavaheapmi, guoimmi ealáhusa váikkuhus earret eará áiggi geavaheapmái ja hupmankultuvrra sáhttet álggos heahkastuhttit. Maiddái soga nana mearkkašupmi sámeservošis buktá mielddis hástalusaid suopmelaš váimmusbearaškultuvrras boahttái.
Korpilähde dutkamuš muitala eandaliige das, mo servoša olggobeale olmmoš oaidná ja vásiha servoša. Korpilähde váldá dutkamušainis oasi ságastallamii máŋggakultuvrralaš máilmmis, servošiin ja bearrašiin, ovdamearkan sus lea suopmelaš, davi máŋggakultuvrralašvuohta.
Dieđut nákkosdilálašvuođa birra:
FL Outi Korpilähde nákkosgirji Kun pohjoisen matkasta tuli elämän mittainen. Suomalaisvaimot saamelaisyhteisössä (Go mátkkis davás bođii eallima guhkkosaš. Suopmelaš eamidat sámeservošis.) dárkkistuvvo Lappi universitehta šaddadandiehtagiid dieđagottis lávvardaga 29.8.2015 diibmu 12 logaldatsáles 2. Vuostenákkáhallin lea doseanta Vappu Sunnari Oulu universitehtas ja kustosin (nakkosdilálašvuođa gohccin) professor Päivi Naskali Lappi universitehtas. Bures boahtin!
Dieđut nákkáhalli birra:
Outi Korpilähde (r. 1954 Roavvenjárggas) lea válmmaštuvvan servodatdiehtagiid magisttarin Jyväskylä universitehtas 1979. Oahpaheaddji pedagogalaš oahpuid son lea čađahan 1996 ja filosofiija lisensiáhta dutkosa 2008 Oulu universitehtas.
Korpilähde lea leamaš lektorin jagi 1992 rájes Sámi oahpahusguovddážis. Lassin son lea leamaš oahpaheaddjin Anára álbmotallaskuvllas (Inarin opisto), doaimmaheaddjin Yleisradios (Lapin radio) ja sosiálabargin Davvi-Lappi bajásgeassinrávvehagas.
Lassedieđut:
Outi Korpilähde
Tel. +358 40 506 4439
okorpila(at)ulapland.fi
Nákkosgirjji preassastuhkaid oažžu Lappi yliopistokustannus deaddilanbáikkis, tel. +358 40 821 4242, julkaisu(at)ulapland.fi
Nákkosgirjji dieđut:
Outi Korpilähde: Kun pohjoisen matkasta tuli elämän mittainen. Suomalaisvaimot saamelaisyhteisössä. Acta Universitatis Lapponiensis 305. ISBN 978-952-484-832-9, ISSN 0788-7604. Fierbmeveršuvdna (pdf): Acta Electronica Universitatis Lapponiensis 172. ISBN (pdf) 978-952-484-833-6. ISSN (pdf) 1796-6310.
|