Boazodoallu ja eanangeavaheapmi ovdan Roavvenjárggas golggotmánus
Boazodoalu ja eanangeavaheami geahčadit máŋgga geahččanguovllus Roavvenjárggas go áššedovdit miehtá Davviriikkaid čoahkkanit boazodoalloseminárii Arktikumii 19.‒21.10.2014. Semináras bohtet ovdan ođđa dutkanbohtosat ja boazodoalu dutkama ja oahpahusa ovddasteaddjit, virgeolbmot ja boazobargit besset lonohallat jurdagiid ja vásáhusaid. Dán riikkaidgaskasaš seminára ulbmilin lea ovddidit boazodoalu dutkama ja gulahallat iešguđet suorggi doibmiiguin.
”Seminára váldofáddán lea boazodollui ja eanangeavaheapmái laktáseaddji gažaldagat Davviriikkain. Semináras gieđahallet maid eará fáttáid, degomat boazodoalu ekologiija, bohcco buresbirgejumi ja boazodoalu kultuvrralaš gažaldagaid”, muitala earenoamášdutki Päivi Soppelo Lappi universitehta Árktalaš guovddážis.
”Okta seminára osiin gieđahallá boazodoalu báikediehtovuogádaga ávkkástallama Suomas. Báikedieđu sáhttá ávkkástallat máŋgga láhkai eanangeavaheami ja boazodoalu plánemis”, muitala joavkojođiheaddji Kari Oinonen Suoma birasguovddážis. Son lea dutkin Suoma birasguovddáža ja Fuođđo- ja guolledoalu dutkanlágádusa POROT-fidnus, man bohtosiid muitalit maid semináras.
Seminára ordne boazodoalloossodat, man davviriikkaid eanandoallodutkiid searvi (NJF) lea aiddobáliid vuođđudan, ovttasbarggus Lappi universitehta Árktalaš guovddážiin, Fuođđo- ja guolledoaluossodagain ja Suomas birasguovddážiin. Eará ovttasbargoguoimmit leat Bálgosiid ovttastus, Sámi oahpahusguovddáš, Swedish Agricultural University ja Norwegian University of Life Sciences. Seminára lea eaŋgalasgillii.
"Reindeer herding and land use management – Nordic perspectives ”seminára interneahttasiiddut ja almmuheamit:
www.ulapland.fi/njf2014
Lassedieđut:
Earenomášdutki Päivä Soppela, Árktalaš guovddáš
tel. +358 400 138 805
paivi.soppela(at)ulapland.fi
Earenomášdutki Jouko Kumpula, RKTL
tel. +358 400 163 073
jouko.kumpula(at)rktl.fi
|