Dearvvuođat Guoládaga sámiin

Lappi allaoahpagas eallinbarggus dahkan sámegiela ja –kultuvrra lektor Leif Rantala lea mátkkiinnis Guoládahkii čoaggán ollu Guoládaga sámiid atno- ja duodjegálvvuid ja girjjiid ja čállosiid, mat gieđahallet Murmánskka guovllu. Rantala lea dál válljen ávdnasis čájáhusa Lappi allaskuvlagirjeráju universitehtaovttadahkii.

Álggoáiggiid Ruošša sámit skeŋkejedje sierralágan diŋggaid Rantalai, muhto fargga sii fuobmášedje ahte gálvvuin sáhttá fidnet juolágan ruhtabihtánai. Ná álggii moaddelot jagi bistán smávva gávppašeapmi, man njuolggadusaid goabbánai oassebealli oahpai dovdat jagiid mielde.

Muhtumin Rantala lea gártan váldit beali gávppašeami morálalaš bealis. Daidda geat leat moaitán dáid gálvvuid skáhppoma Rantala vástida dadjamiin, ahte gálvvut seilot sakka buorebut Suomas go Ruoššas. Dán duođašta earáid eará dat ahte Ruošša sámit galledit duollet dálle Rantala čoakkáldaga ja dutket boares dieđalaš girjjiid, mat leat jávkan Ruošša girjerájuin áigá juo, Rantala dadjá .

“Moadde jagi dassái galledin máŋgii muhtun sámedálu ja dálu áhkus ledje viehka ollu veaddeduojit, mat ledje hárvenasat. In goitge rásken álgit skáhppot daid dujiid. Mo de dasto geavai? Muhtun jagi dán maŋŋá olles dállu bulii ovttas veaddedujiiguin ja áhkkunai duššai dollavahágii. Livččii galgan oastit...”

Dieđalaš girjjiid Rantala lea ee. skáhppon nu ahte jagis 1990 bijai almmuhusa murmánskkalaš aviisii. Dás duohko olbmot leat váldán suinna oktavuođa ja álggus muhtumat sáddejedje girjjiid poastta mielde soahpamuša haga. Muhtun girjjiid gaskkusteaddji olbmot leat doallan oktavuođaid otná rádjái.

Guoládaga sámiid lassin leat mielde maid eará davviálgoálbmogiid gálvvut ja Beahcámii guoskevaš girjjálašvuohta.

Čájáhus lea rabas 24.4.-19.6.2014 Roavvenjárggas, Lappi allaskuvlagirjeráju universitehtaovttadaga 2. gearddis, Yliopistonkatu 8.

Bures boahtin ! Puurr puedtmušš!