Máŋggat máilmmi eamiálbmogat, maiddái sámit, leat gártan oahpallat ođđa giela ja kultuvrra skuvlii vuolggedettiin. Buresbirgejeaddji stáhtaid skuvlenpolitihkká lea fállan vejolašvuođa alla dási skuvlejupmái, muhto seammás dat lea doaibman beaktilis váldokultuvrii suddajeaddjin ja gáidadan sápmelaččaid kultuvras ja gielas. Vaikko áiggit leat rievdan, sámegielat ja sámegiela oahpahus lea fidnemis, lea dábálaš ahte oarjemáilmmi skuvlakultuvra hálddaša skuvllaid doaibmanvugiid. Skuvla sisdoalut galggašedjege ovdánit dakkárin ahte oahpahusa guovddážis livččii sápmelaš máilmmigovva ja sápmelaš vuolggasadji vuhttošii skuvla sisdoaluin ja árgga geavadagaid ollašuhttimis.
Sámi pedagogihkka figgá vuhtiiváldit skuvlahistorjá, muhtumin lossesge, oktavuođa sápmelaččaid eallimii. Sámi pedagogihkka vuođđuda sápmelaš bajásgeassin árbái ja dan váimmusdahkkit leat sápmelaš oahppoplána ovddideapmi, sámegiela nannen, kultursensitiivalaččat ordnejuvvon oahpahus ja skuvlabarggut main ovttasbargu lea guovddážis.
Rauna Rahko-Ravantti, universitehtaoahpaheaddji, pedagogalaš dieđágoddi
|