Sápmelaččaid buresbirgemis riikaviidosaš dutkamuš
Lappi universiteahta sosiálabarggu oahpposuorgi ollašuhttá ođđa dutkan- ja ovdánahttifidnu, mas vuosttas geardde čielggaduvvo riikaviidosaččat sápmelaččaid buresbirgejupmi. Fidnu ulbmilin lea ovddidit bargoahkásaš sápmelaččaid buresbirgejumi ja vejolašvuođaid leat geabbilit bargomárkaniin.
Dutkit čogget dieđuid sámiid bálvalusvásáhusain, -dárbbuin ja bargomárkandilálašvuođain olles riikkas. Lassin dutkit ovdánahttet sápmelaččaid oasálastima várás doaibmanmálle ja čohkkejit doarjagin álbmotjoavkkuid ságastallat ja plánet bálvalusaid. Čoggon dieđuin lea ávki ja doarjja sápmelaččaid sote –bálvalusaid ođastusa lágideamis.
– Olbmo nana identitehta lea okta dehálaš buresbirgema oassi unnitloguid buohta. Eatnigiella nanne olbmo kultuvrralaš identitehta ja oktavuođa kultuvrii. Seammás dat nanne maid sosiálalaš oktavuođaid ja servoša. Máŋggabealat giellabirrasat dorjot ealli guovttegielatvuođa. Árrabajásgeassima ovddasteaddjit lea guovddáš olbmot go giellabirrasat hábmejuvvojit, dadjá fidnu jođiheaddji Lydia Heikkilä.
Fidnus dutkit ollašuhttet gažadan- ja jearahallandutkamuša buresbirgema bálvalusvásáhusain ja bálvalusaid fidnemis. Čuozáhatjoavkun leat sápmelaččat, geat ásset sámiid ruovttuguovllu olggobealde. Lassin čielggaduvvo mo dearvvasvuođa-, mánáidgárde-, vuođđooahpahus-, mánáidrávvehat-, bearaš-, boares olbmuid ja psykososiálalaš bálvalusaid ja dan mo dat sáhtašedje buorebut doarjut sámekultuvrra nu, ahte bálvalusat šattašedje sápmelaččaid persovnnalaš ja servodatlaš vuoibmin.
– Dán fidnus ovdánahttojuvvojit ođđa dutkanmetodat álgoálbmogiid vuolggasajis ja ehtalaš geavadagat. Lassin čilgejuvvo mii mearkkašumiid bálvalusain lea sápmelaččaid buori eallidilis, ja dat mo bálvalusat bisuhit sámegiela ja kultuvrra eallinvuoimmi, Heikkilä dadjá.
Fidnu lea válmmaštallojuvvon ovttas sámedikkiin, Davvi-Suoma sosiálasuorggi máhttinguovddážin, Sámi oahpahusguovddážin, Sámi Soster rs. ja Lappi buohccedikšunbiiren. Fidnu bistá golbma jagi ja ollašuhttojuvvo sosiála- ja dearvvasvuođaministeriija ESR-ruhtademiin.
Eambbo dieđut:
Dutkandoavttir Lydia Heikkilä
Lappi universiteahta
Telefon 040 484 4080
|