Semináras ságastallo boazodoalu boahttevuođas
Davviriikalaš dutkit ja áššedovdit čoahkkanit boazodoalloseminárii Roavvenjárgii Arktikumii golggotmánu 19.–21. beaivve 2014. Seminára váldotemán leat boazodollui ja boazodoalloguovllu eanangeavaheapmái laktáseaddji gažaldagat Davviriikkain. Semináras bohtet ovdan ođđa dutkanbohtosat ja boazodoalu dutkama ja oahpahusa ovddasteaddjit, virgeolbmot ja boazobargit besset lonohallat jurdagiid ja vásáhusaid. Dán riikkaidgaskasaš seminára ulbmilin lea ovddidit boazodoalu dutkama ja gulahallat iešguđet suorggi doibmiiguin.
Päivi Soppela/Árktalaš guovddáš
Vuossárgga vuosttas váldosáhkavuoru doallá Lappi universitehta Árktalaš guovddáža dutki, vuoigatvuođa lisensiáhta Juha Joona, gii geahčada boazodoalu vuoigatvuođalaš sajádaga geahččanguovllus. Joona lea dutkan báikkálaš olbmuid vuoigatvuođaid eanageavaheapmái earenomážit dain stáhta eatnamiin Sámis, maid Suopma ja Ruoŧŧa oamastit.
Maŋŋebárgga dutki Bård-Jørgen Bårdsen Norgga luonddudutkama instituhtas (Norwegian Institute for Natural Reseach) hállá dálkkádaga ja guohtuneatnamiid váikkuhusain bohccuid ahtanuššamii ja jápminlohkui. Bårdsen lea dutkamušastis vudjon dasa, mo dálkkádat ovttas olbmo doaimmaiguin váikkuhit davviguovllu sosioekologalaš vuogádagaide, degomat boazodollui. Ubmi universitehta Sámedutkama guovddáža Vaartoe jođiheaddji Annette Löf, gii lea áiddo nákkáhallan, suokkardallá sáhkavuorustis das, leago boazodoalu vuogáiduvvan ja sodjan olgguldas nuppástusaide álo buorre ášši. Dán lassin son hástala bissovaš doahpaga ja jearrá, gean geahččanguovllus bissovašvuohta lea meroštallon.
Eará dán guovtti beaivvi seminára fáttát leat boazodoalu ja eará birrasa ja dan fáktoriid ja osiid guhkkit áiggit váikkuhusat guohtuneatnamiid šattuide, eanageavaheami ja boraspiriid váikkuhusat boazodollui ja boazodoalu ruđalaš, sosiála ja kultuvrralaš gažaldagat. Okta seminára osiin gieđahallá Suomas gárggiiduvvon boazodoalu báikediehtovuogádaga ja mo dan sáhttá ávkkástallat go plánet, mo iešguđetlágan eanangeavahanvuogit doibmet ovttas.
Seminára ordne davviriikkaid eanandoallodutkiid searvvi (NJF) boazodoalloossodat ovttasbarggus Lappi universitehta Árktalaš guovddážiin, Fuođđo- ja guolledoaluossodagain ja Suomas birasguovddážiin. Eará ovttasbargoguoimmit leat Bálgosiid ovttastus, Sámi oahpahusguovddáš, Ruoŧa eanadoallouniversitehta (Swedish Agricultural University) ja Norgga luonddudutkama instituhtta (Norwegian University of Life Sciences). Seminára lea eaŋgalasgillii.
Seminára prográmma
Lassedieđut:
Earenomášdutki Päivä Soppela, Lappi universitehta Árktalaš guovddáš
tel. +358 40 013 8805, paivi.soppela(at)ulapland.fi
Earenomášdutki Jouko Kumpula, RKTL
tel. +358 40 016 3073, jouko.kumpula(at)rktl.fi
LaY/AK/JW
|