Dáidda davvin máilbmái

Lappi allaoahpahaga dáidagiid dieđagoddi lea kreativiteahta gáldu, mas dáidda dahkkojuvvo diehtaga bálddas. Diehtaga lassin dáiddalaš doaibma lea guovddášoassi dieđagotti vuođđo- ja joatkkadutkanskuvlejumis, dutkamušas, rávesolbmuid skuvlejumis ja vel guovlluid ovddideames. Dieđagotti dáiddalaš doaibma speadjalastá Lappi ja olles riikka kultureallima ja riikkaidgaskasaš ovttasbargofierpmádagaid rádjai. Dieđagoddi bargá lagas ovttasbarggus visuálalaš dáidaga ja kultuvrra surggiin ja sámiid kultur- ja skuvlenorganisašuvnnaiguin.

Dáidagiid dieđagoddi lea guovddášdahkki sámedáidaga dutkamušas Norgga, Ruoŧa, Ruošša ja Suoma sámeguovlluin. Dieđagotti bargoveaga gaskkas gávdnojit ee. govvadáidaga, mediadáidaga, hábmema ja velá biras- ja servodatdáidaga áššedovdit. Oahppit dahket dáidaga iežaset dutkamušain ja oahppoprošeavttain, mat sáhttet leat čájáhusat, dáiddadáhpahusat, gálvoovddidanprošeavttat dahje dáiddalaš oahpahusdagut. Dasa lassin dieđagoddi koordinere dáidaga ja dutkamuša ovttastahtti innovatiivvalaš prošeavttaid ja doallá badjin galleriijasajiid ja fierbmegalleriijaid.

 
Davvivuohta ja riikkaidgaskasašvuohta bálddalagaid

Dieđagotti dáiddalaš doaibma viggá leat ekologalaččat, kultuvrralaččat ja sosiálalaččat suvdil ja lagas oktavuođas davi birrasiidda ja servodagaide. Dan sivas dáidda dahkkojuvvo ja ovddiduvvo báikkálaš, regiovnnalaš ja riikkaidgaskasaš guimmiiguin ovttas dakkár bálvalusaiguin, mat dorjot birrasa vásáhusindustriia, turismma ja davveguovlluid eallindiliid ja skuvlema. Erenoamáš deaddu dáiddalaš doaimmas – dego maiddái dáidaga dieđagotti dutkamušain ja oahpahusas – leatge davvivuohta ja arktalašvuohta, vásáhusindustriija ja turismma doarju kreatiivvalaš čovdosat ja hábmen.

Báikkálaš, regiovnnalaš ja riikkaidgaskasaš ovttasbargu dahkkojuvvo ee. viiddis ovddidanprošeavttain, maid vuođđun leat dáiddalaš doaimma ja dutkamuša vuorrováikkuhus. Iežas prošeavttaid olis dáidagiid dieđagoddi lea ovddidan erenoamážit servodatlaš dáiddabajásgeassima, biras- ja servodatdáidaga ja dálvedáidaga.