Mii oskut ahte Ipmil áhčči lea min Almmálaš áhčči, guhte lea sivdnidan min ja lea dovdan min ovdal go mii riegádeimmet. Son diehtá buot min birra, min dárbbuid birra, son ii leat goassege guhkkin eret mis, ja son ráhkista min.

Sáhttá go buot leat bassi, vai leat go dušše dihto dávvirat bassi? Almmálaš áhči namma lea bassi, ja sáhttá leat stuoris ja bassi min gaskkas. Mii galgat árvvusatnit, sutnje galgá buot gudni ja giitosat. Son lea buotveagalaš ja lea midjiide addán buot, mii mis leat.Lea álki midjiide olbmuide geavahit Ipmila nama duššálažžan. Mii dadjat dan jurdilkeahttá maid dadjat ja manne. Ipmila namma galgá leat bassi. Mun galggan gal Ipmila nama geavahit, muhto dajan “Ipmil” dahje “Jesus” dušše dalle go háleštan Ipmiliin, dalle go rohkadalan.
Sámi árbevierus lea namabidjan dehálaš. Boahtá dát oainnus ahte nammii čuvvot dihto iešvuođat. Lea leamaš dábálaš addit mánnái nama muhtun fuolkki maŋis. Dalle lei sávaldat ahte dán fuolkki iešvuođat galge čuovvut nama mielde mánnái. Sáhtát go gávnnahit lea go giige du bearrašis ožžon namas fuolkki maŋis, ja leat go dán fuolkki iešvuođat leamaš dehálaččat nama válljemis? Gáimmežat leat iešalddis fulkkežat. Namma šaddá govvan das, ahte sudno gaskkas lea oaidnemeahttun čanastat.
 

LUTHERA ČILGEHUS

Ipmila namma lea gal bassi iešalddis, muhto dán rohkosis mii rohkadallat ahte dat basuhuvvošii dáppe min luhtte ge.

 

Mo dat dáhpáhuvvá?

Dat dáhpáhuvvá go Ipmila sátni oahpahuvvo buhttásit ja rievttuid, ja go mii ge eallit bassi eallingearddis Ipmila mánnán. Veahkehivččet min dasa, ráhkis Ipmil Áhčči almmis! Muhto son guhte oahpaha ja eallá eará láhkai go Ipmila sátni oahpaha, eahpebasuha Ipmila nama min gaskkas. Várjalivččet min das eret, almmálaš Áhčči!

 

Lávvu lea sihke orrunbáiki, boradanbáiki ja oktasašvuođa báiki. Lávvu addá suoji ja ovddasta olbmuid vádjoleami ja mihttomeari.

 

Biibbalis lohkat johtti álbmogiid birra geat ásse tealttás. Sáhttá earret eará lohkat Abrahama birra gii ásai tealttás Issáhiin ja Jáhkobiin (Hebr. 11,9) ja Moses birra, gii ceggii goađi siidda olggobeallái (2. Mos 33,7).

 

Lávu cakkit sáhttet ovddastit Áhči, Bártni ja Bassi vuoiŋŋa. Eará lávvomuorat leat olbmot guđet hukset eallimiideaset golbmaoktalašvuođa alde.