Mii rohkadallat ahte Ipmila riika galgá boahtit min lusa dáppe eatnamis, ja ahte boahtá buot olbmuide eatnanspáppas. Lea vuosttažettiin Jesus mii čájeha midjiide maid Ipmila riika lea. Go lohkat Biibbalis, de oahpásmuvvat Jesusiin. Maid son dagai? Maid son dajai? Mii dáhpáhuvai olbmuiguin su birrasis? Maid dat duođaid máksá, ahte Ipmila riika boahtá eatnamii? Máksá go dát ahte oažžut áibbas buorre máilmmi mas buohkat leat álo šiega guđet guimmiideaset, vai sáhttá go máksit juoidá eará?

 

Ipmil háliida ahte mii buohkat galgat boahtit su lusa, son čuorvu min ja ohcá láhppon mánáidis su Bassi vuoiŋŋa bokte. De oahpaha ja veahkeha Bassi vuoigŋa min bálvalit Ipmila, ja čilge min čállosiid – nu ahte beassat dovdat Ipmila almmálaš fámu dáppe eatnamis.

 

LUTHERA ČILGEHUS

Ipmila riika gal boahtá iešalddis min rohkadalakeahttá, muhto dán rohkosis mii rohkadallat ahte dat boađášii min lusa ge.

 

Mo dat dáhpáhuvvá?

Dat dáhpáhuvvá go almmálaš Áhčči addá midjiide Bassi Vuoiŋŋas, nu ahte mii oažžut árpmu oskut su bassi sátnái ja eallit su dáhtu mielde sihke dáppe dán áiggis ja dasto agálašvuođas.
 

Lávvu lea sihke orrunbáiki, boradanbáiki ja oktasašvuođa báiki. Lávvu addá suoji ja ovddasta olbmuid vádjoleami ja mihttomeari.

 

Biibbalis lohkat johtti álbmogiid birra geat ásse tealttás. Sáhttá earret eará lohkat Abrahama birra gii ásai tealttás Issáhiin ja Jáhkobiin (Hebr. 11,9) ja Moses birra, gii ceggii goađi siidda olggobeallái (2. Mos 33,7).

 

Lávu cakkit sáhttet ovddastit Áhči, Bártni ja Bassi vuoiŋŋa. Eará lávvomuorat leat olbmot guđet hukset eallimiideaset golbmaoktalašvuođa alde.