Dán rohkosis rohkadallat ahte Ipmila dáhttu galgá šaddat buot áššiin ja juohke olbmos. Ipmil hálddaša buot, muhto bahás vuoiŋŋat sáhttet váldit olbmuid iežaset háldui. Mii rohkadallat ahte Ipmila dáhttu galgá šaddat, ja mii rohkadallat ahte Ipmila dáhttu stivrešii min, eallimiiddámetguin, bearrašiiddámetguin, sogaideametguin, searvegottiideametguin, girkuineamet, báhpaideametguin ja jođiheddjiideametguin min giliin, gávpogiin ja riikkain.

 

Dorvvastan go Ipmilii? Luohtán go iežan áhččái ja eadnái? Áiggun dávjá dahkat dakkára maid mu váhnemat eaba suova....Čájehuvvo maŋŋá ahte soai diđiiga mii lei riekta,mun livččen galgan guldalit sudno ráđiid! Ja Ipmil diehtá mii lea buorre munnje. Danin háliidan áinnas dadjat: “Šaddos du dáhttu”.Jáhkát go lea álki dahje váttis dahkat dan maid Ipmil háliida, ii fal nu mo ieš háliidat? Dávjá in leat áibbas sihkkar mii Ipmila dáhttu lea. Ođđa testameantta evangeliat muitalit juoidá dan birra mo Ipmila plána olbmuid várás lea, ja oahpahus girkus muitala maid juoidá. Dalle beasan diehtit eambbo das, mii Su dáhttu lea.

Lea ollu mii dáhpáhuvvá mii ii dáidde leat Ipmila dáhtu mielde. Soahti ja heahti leat ovdamearkkat. Lea min iežamet duohken háliidit go dahket buriid, vai diktit go iežamet dahkat baháid maid. Buot dain, mii dáhpáhuvvá, lea bálggis Ipmila lusa.

 

LUTHERA ČILGEHUS:

Ipmila buorre ja árbmugas dáhttu gal šaddá min rohkadalakeahttá, muhto dán rohkosis mii rohkadallat ahte dat šattašii dáppe min luhtte ge.

 

Mo dat dáhpáhuvvá?

Dat dáhpáhuvvá go Ipmil hehtte buot bahás áigumušaid ja meanuid mat bohtet beargalagas, máilmmis ja min suttolaš oaččis. Dat eai dáhto min atnit Ipmila nama bassin eai ge diktit su riikka boahtit. Muhto Ipmila dáhttu šaddá go son nanne min ja bisuha min sánis ja oskkus gitta min maŋimuš boddui. Dat lea su árbmugas ja buorre dáhttu.

Lávvu lea sihke orrunbáiki, boradanbáiki ja oktasašvuođa báiki. Lávvu addá suoji ja ovddasta olbmuid vádjoleami ja mihttomeari.

 

Biibbalis lohkat johtti álbmogiid birra geat ásse tealttás. Sáhttá earret eará lohkat Abrahama birra gii ásai tealttás Issáhiin ja Jáhkobiin (Hebr. 11,9) ja Moses birra, gii ceggii goađi siidda olggobeallái (2. Mos 33,7).

 

Lávu cakkit sáhttet ovddastit Áhči, Bártni ja Bassi vuoiŋŋa. Eará lávvomuorat leat olbmot guđet hukset eallimiideaset golbmaoktalašvuođa alde.