Maid jurddašat go gulat dajaldaga “min beaivválaš láibbi” – it goit jurddaš duššefal láibevajahasaid? Láibi symbolisere borramuša obalohkái. Láibi ii leat ge dušše niesteláibi, muhto maiddái láibi maid oažžut bassi eahkedismállásiin.

 

Mii rohkadallat ahte Ipmil juohke beaivi galgá addit midjiide buot maid dárbbašit, ja ahte oahppat giitit buot buriin maid Ipmil lea addán midjiide. Láibi symbolisere buot maid dárbbašit eallimis, nu mo borramuš ja juhkamuš, biktasat ja gápmagat, viessu ja ruoktu, bealdu ja šibihat, ruđat ja opmodat, buorre náittosguoibmi ja buorit mánát, buorit bargit ja buorit ja luohtehahtti bargoaddit, buorit eiseválddit, buorre dálki, ráfi, dearvvašvuohta, buorit dábit, buorre namma ja beaggin, buorit ustibat ja oskkáldas ránnját.
Ipmila dáhttu lea ahte galgá mannat bures duinna, muhto don fertet leat giitevaš ja vel duostat dorvvastit Ipmilii. Mii galgat giitit buot buriid ovddas maid Ipmil lea addán midjiide, ja rohkadallat viissisvuođa fuolahit buot su dáhtu mielde.

 

Máŋggas sámi servvodagas leat boarrásiin oahppan ahte galgá váldit várá buot borramušas. Dát lea fal eambbo go dušše seastevašvuohta. Borramuš gohčoduvvui “Luondduláhjin” dahje “Ipmilláhjin”. Dáid láhjiid galgá váldit vuostá giitevašvuođain, ii ge galgga daid duššas golahit. Olbmot leat sorjavaččat eatnamii ja buot šattuide ja elliide. Eatnanspáppas lea doarvái buohkaid dárbbuid gokčat, muhto ii leat doarvái buohkaid vuovdnáivuhtii. Maid dát máksá?

 

LUTHERA ČILGEHUS

Ipmil gal addá midjiide beaivválaš láibbi, velá bahás olbmuide ge, min rohkadalakeahttá. Muhto dán rohkosis mii rohkadallat ahte son suovašii min ipmirdit ahte beaivválaš láibi lea su attáldat, ja vuostáiváldit dan giitalusain.
 

Lávvu lea sihke orrunbáiki, boradanbáiki ja oktasašvuođa báiki. Lávvu addá suoji ja ovddasta olbmuid vádjoleami ja mihttomeari.

 

Biibbalis lohkat johtti álbmogiid birra geat ásse tealttás. Sáhttá earret eará lohkat Abrahama birra gii ásai tealttás Issáhiin ja Jáhkobiin (Hebr. 11,9) ja Moses birra, gii ceggii goađi siidda olggobeallái (2. Mos 33,7).

 

Lávu cakkit sáhttet ovddastit Áhči, Bártni ja Bassi vuoiŋŋa. Eará lávvomuorat leat olbmot guđet hukset eallimiideaset golbmaoktalašvuođa alde.