Ipmilbálvalus lávus?

Vásse 300 jagi ovdal go vuosttaš kristtalaččat besse Ipmilbálvalusa ávvudit sierra girkoviesuin. Dassážii ávvudedje Ipmilbálvalusaid priváhta ruovttuin.
Sáhttit jáhkkit ahte olbmot čohkkájedje beavddi birra go Ipmilbálvalusa ávvudedje. Oktasašvuohta bođii ovdan dainna ahte juohkehaš lei mielde hábmemin bottu. Muhtumat málestedje, earát ges lávlo, muhtumat lohke teavsttaid, muhtumat bukte profetiijaid jnv.

Go girkuid hukse šattai daid vuođđun romalaš dállodoallu mas lávejedje čoahkkanit beavddi birra. Viesu isit čohkkái beavdegeažis.
ávvu lea maid leamaš ”Ipmilbálvalusa” báikin.
Boaššu lei bassi dávviriid ja borramuša báiki. Boaššu lea árvvusadnon lávu eanemus suddjejuvvon báikin. Ii oktage oaččo dan duolbmat dahje dan badjel njuikut. Jus galgat bassi eahkedismállásiid ávvudit lávus, de livččii lunddolaš bidjat eahkedismállásiid dávviriid boššui. Ovdamearkadihte lea riekta bidjat Biibbala boššui. Biibal han lea  sihke “almmálaš láibi” ja bassi dávvir.

Lávus leat dábálaččat leamaš fásta sajit bearrašii. Áhči ja eatni sajit leat leamaš boaššu lahka, árrana goabbáge bealde. Jus galgá Ipmilbálvalusa ávvudit lávus, de livččii lunddolaš ahte báhppa čohkká boaššu lahka.

Árran lea eallingáldu symbolan. Midjiide livččii lunddolaš atnit árrana Kristus-symbolan. Son lea máilmmi čuovggas. Mii geasuhuvvot árrana čuvgii ja lieggasii. Árran lea lunddolaš čoahkkebáiki.
(Tore Johnsen, Tromsa, 15.09.2006)