Almmipoartta guoras
Almmipoartta guoras lea Bassi Biehtár. Guhkkin son oaidná muhtin olbmá gii rahča bajás luohká. Sus lea lossa noađđi. Viimmat olle. Olmmái šuohkiha ja luoitá seahka. De boahtá vuoras nisu vácci. Garra eallin sus vuhtto leamaš. Son savkala Bassi Biehtárii moadde sáni ja beassá sisa.
Olmmái rahpá seahká ja ohca guokte boares girjji. Dá lea Luthera uhca katekismus ja Laestadiusa poasttal, dadjá olmmái movttain. Dan botta go son lea sártnodeamen, de boahtá nuorra olmmái gii lea vuovttaid čatnan heasttaseaibin ja sus lea riekkis njunis. Nuorra olmmái savkala Bassi Biehtárii ja beassá sisa.
Olmmái ain burgá seahka ja čájeha beaivegirjji: Mun lean leamaš searvegottiráđis, bismagottiráđis.... Son gaskkalduvvá go muhtin vuoras olmmái boahtá, savkala muhtin sáni ja čappa mojiin manná sisa. Velá goalmmát gearddi olmmái burgá seahka, ja čájeha duođaštusaid go lea addán ruđaid Girku Heahteveahkkái, Mišuvdnii ja .... De fas gaskkalduvvá go muhtin finánsaolmmái botke su sártnodeami, savkala muhtin sáni ja beassá njuolga sisa. Dál olmmái veahá suhttá, geahččá Bassi Biehtárii ja jietna vel doarggista go jearrá sus: geat leat dát olbmuid geaid don luoittát sisa.... sis eai leat makkárge duođaštusat! Morrašiin geahččá Bassi Biehtár dán olbmái ja dadjá: Sii dovdet Jesusa iežaset beastin ja ustibin. Dat lea sin duođaštus.
Mii min fillehus lea otná beaivvi: oskut min iežamet doaimmaide. Vuosttaš risttalaččat fuomášedje suttu iežaset duohken ja dat lei čeavláivuohta, dan gohčodejde Hybris. Lei nu álki lonuhit oinnolaš suttuid ja gahččat ođđa suddui ja jurddašit: Mun lean veahá buoret go.....
Oskku ii leat min olahus – muhto boađus Jesusa dagus.
