Sáhka Márjái

Smiehta vuos dáid:

· Mo jáhkát lea jus olmmoš šaddá váhnemin nuppelotjahkásažžan?

· Maid jáhkát livččii váddáseamos jus váhnen šaddá nuorran?

· Mo jáhkát leat máná vuostá šaddat go ii leat irgi?

 

Loga muitalusa Márjjá birra  Lukas 1, 26-38.

 

· Man birra lea dát teaksta?

· Mii fáttáid meannuda teaksta?

· Mii lea du mielas čalbmáičuohcci dán teavsttas?

· Geaiguin deaivvadit dán muitalusas?

· Maid beassat Márjjá birra diehtit? Maid beassat eŋgela Gabriela birra diehtit?

Mo reagere Márjá go eŋgel boahtá su lusa? 

· Mii lea eŋgela sáhka Márjái?

· Manin lea Márjá fuolas go gullá eŋgela sága?

· Maid muitala eŋgel Ipmila birra?

· Geas sáhttet min áiggis leat sullásaš vásáhusat go Márjjás ja Jovssehis?

· Man láhkái deaivvadit odne áhpehis nuoraid?

· Mo orru du mielas go nuorat ávžžuhuvvojit váldit abortta?

·Man láhkái galggašeimmet deaivvadit nuorra nieiddaid ja bártniid geat šaddet váhnemin?

 

Loga muitalusa oktii vel, ja smiehtas dán:

 

· Maid sáhttit dahkat nuoraid ovddas geat šaddet váhnemin?

· Mo sáhttet nuorat geat šaddet váhnemin beassat vásihit ahte Ipmil lea sin fárus, nu mo Ipmil lei Márjjá ja Jovsseha fárus?

Čáhci lea guovddážis sihke min árgabeaivvis ja oskuoahpahusas.

Čáhci lea searaid ája ja buktá eallima. Ádjagis gávdnat juhkamuša. Čáhci lea juo ovdal sivdnideami čieža beaivvi. Lea daddjon ahte čáhci ja Ipmila vuoigŋa leat doppe, ovdal go sivdnideapmi álgá.

Čáhci geavahuvvo gásttas. Lutherána girkus lea dábálaš ahte mánát gásttašuvvojit, muhto dađistaga lea šaddan dábálažžan gásttašuvvot maiddái nuorran dahje olleolmmožin. Go mánná gásttašuvvo, de son guhte gásttaša máná, goaivu veaháš čázi máná oaivái golbmii ja gásttaša su Áhči, Bártni ja Bassi vuoiŋŋa nammii. Ipmila sáni haga gásttas livččii čáhci dušše čáhcin. Gástačáhci šaddá bassi čáhcin go geavahuvvo Ipmil sániin. Ruovttogástta olis guddojuvvo gástačáhci olggos, ja leikejuvvo viesu nuorttabealde dahje doppe gos olbmot eai jođe.

Girku álgoáiggis lei konfirmašuvdna gástta oassin. Geavatlaš sivaid geažil sirrejuvvojedje konfirmašuvdna ja gásta. Konfirmašuvdna šattai de sierra girkolaš dahkku, ja áiggi mielde šattai maid iešheanalaš sakrameanta gástta lassin. Juohke jagi konfirmerejuvvojit sullii 40 000 nuora Norgga girkus.