Girkohistorjá
Vásse 300 jagi ovdal go vuosttaš risttalaččat ožžo sierra girkoviesuid. Dassážii dolle dábálaččat ipmilbálvalusaid priváhta ruovttuin. Jáhkkimis čohkkájedje beavddi birra, ná bođii oktasašvuohta ovdan, go buohkat válde oasi.
Go girkut huksejuvvojedje lei vuolggasadji mo čohkkájedje guhkesbeavddi birra romalaš bearrašis. Siidaisit čohkkái bajimusas. Seammá oaidnit girkus dál, báhppa guhte jođiha ipmilbálvalusa čuožžu bajimusas girkolanjas.
Otná oskubáiki lea girku. Boares testameanttas, mas olbmot sohpe Ipmiliin, leat bassi báikkit dihto báikkiin, earret eará oaččui Moses logi báhkkoma Sinai-vári alde. Lea movttiidahtti leat luonddus ipmilbálvalusas. Maiddái pilegrimvádjoleamit leat bivnnuhat máŋgasiid gaskkas. Mo livččii doallat ipmilbálvalusaid olgun, nu ahte livččii luonddu lahka ja ipmila lahka oktanaga? Dán láhkái ii šat ráddje oskueallima girkui viessun, muhto čatná dan dihto báikkiide luonddus, ja duovdagiidda main lea erenoamáš historjá.
Sisdoalu birra
Girkus nannejuvvo oktasašvuođa. Mii váldit oasi risttalaš oktasašvuođas Ipmiliin ja guđet guimmiideametguin oskku bokte Jesus Kristusii. Ipmil ii hálit ahte mii galgat leat risttalažžan okto. Ipmilbálvalusas boahtá dát oktasašvuohta oidnosii go mii ovttas dovddastit oskomet, váldit vuostá bassi eahkedismállásiid, rohkadallat ja lávlut sálmmaid. Áhččámet lea rohkos maid Jesus ieš lea oahpahan midjiide.
Ipmilbálvalusas leat máŋgga oasi; biibbalteavsttat, sárdni, rohkosat, sálmmat ja bassi eahkedismállásat. Juohke sotnabeaivvis lea fáddá, mii mearrida biibbalteavsttaid, sártni ja makkár sálmmaid lávlut. Leat sierra liturgiijat gástta, konfirmašuvnna, hávdádusa ja heajaid várás. Sii geat leat veahkeheamen, barget iešguđetge bargguid ja devdet iešguđetge rollaid, ja buot mii dáhpáhuvvá, lea vissis ortnega mielde.
Man láhkái šaddá Ipmilbálvalus sámi Ipmilbálvalussan? Lea go dalle go sámegiella gullo? Lea go girkku čiŋadeapmi mii mearrida? Lea go sártni ja rohkosiid ja liturgiija sisdoallu? Lea go musihkka? Leat go sii geat váldet oasi Ipmilbálvalusas?
Sihke sámegiel sárdni ja sámegiel sálbmalávlun váikkuhit dasa ahte Ipmilbálvalus šaddá sápmin. Maiddái girkoviessu, dáidda ja girkku symbolat sáhttet váikkuhit dasa ahte Ipmilbálvalus oažžu sámi hámi. Liturgalaš biktasat maid báhppa, kántor ja katekehta geavahit, čalmmustuhttet maid sámevuođa ivnniiguin, symbolaiguin ja minstariiguin. Báikkálaš girku ja searvegotteráđđi áigu láhčit Ipmilbálvalusa nu ahte buohkat báikkálaš birrasis dovdet ahte girku lea maiddái sin girkun.
