Ipmilbálvalus lávus?
Sáhttá go ipmilbálvalusa ávvudit lávus? Báiki mas dovdá oktasašvuođa dollagáttis, lea maid latnja mas sámegiella, sámekultuvra ja sámi árvvut lunddolaččat bohtet oidnosii.
-Lávvu lea vuogas. Olbmuid oktasašvuođadovdu iešguđetge báikkiide leat nannosit čadnon dihto dovdduide ja vásáhusaide jus dáinna báikkiin. Sáhttet leat sihke buorit ja fuones vásáhusat. Leat báikkit maidda liikot, ja báikkit maidda eat liiko.
-Lávu jorbes hápmi ovddida oktasašvuođa. Árran lea maid jorbbas. Dakkár jorbes hápmi sáhttá maid čájehit ahte buohkat leat seammaárvosaččat. Naba suovva mii loktana árranis? Dát sáhttá ovddastit rohkosiid mat badjánit Ipmilii. Mo jus čilge ahte Bassi Vuoigŋa lea dego suovva?
-Mii sáhttit vásihit Ipmila lagasvuođas lávus, girkolanjas ja luonddus. Na, juohke sajis. Ipmila ii sáhte giddet dihto báikkiide.
Mii lea buorre dainna go ipmilbálvalusa ávvuda eará báikkiin go girkus? Manne/manne ii galggašii dan dahkat?
Sisdoalu birra
Girkus nannejuvvo oktasašvuođa. Mii váldit oasi risttalaš oktasašvuođas Ipmiliin ja guđet guimmiideametguin oskku bokte Jesus Kristusii. Ipmil ii hálit ahte mii galgat leat risttalažžan okto. Ipmilbálvalusas boahtá dát oktasašvuohta oidnosii go mii ovttas dovddastit oskomet, váldit vuostá bassi eahkedismállásiid, rohkadallat ja lávlut sálmmaid. Áhččámet lea rohkos maid Jesus ieš lea oahpahan midjiide.
Ipmilbálvalusas leat máŋgga oasi; biibbalteavsttat, sárdni, rohkosat, sálmmat ja bassi eahkedismállásat. Juohke sotnabeaivvis lea fáddá, mii mearrida biibbalteavsttaid, sártni ja makkár sálmmaid lávlut. Leat sierra liturgiijat gástta, konfirmašuvnna, hávdádusa ja heajaid várás. Sii geat leat veahkeheamen, barget iešguđetge bargguid ja devdet iešguđetge rollaid, ja buot mii dáhpáhuvvá, lea vissis ortnega mielde.
Man láhkái šaddá Ipmilbálvalus sámi Ipmilbálvalussan? Lea go dalle go sámegiella gullo? Lea go girkku čiŋadeapmi mii mearrida? Lea go sártni ja rohkosiid ja liturgiija sisdoallu? Lea go musihkka? Leat go sii geat váldet oasi Ipmilbálvalusas?
Sihke sámegiel sárdni ja sámegiel sálbmalávlun váikkuhit dasa ahte Ipmilbálvalus šaddá sápmin. Maiddái girkoviessu, dáidda ja girkku symbolat sáhttet váikkuhit dasa ahte Ipmilbálvalus oažžu sámi hámi. Liturgalaš biktasat maid báhppa, kántor ja katekehta geavahit, čalmmustuhttet maid sámevuođa ivnniiguin, symbolaiguin ja minstariiguin. Báikkálaš girku ja searvegotteráđđi áigu láhčit Ipmilbálvalusa nu ahte buohkat báikkálaš birrasis dovdet ahte girku lea maiddái sin girkun.
